Hitlerin ölümünün gizli detalları: İntihar xəbəri təkcə bu şəxsə deyilib - FSB arxivi açdı

Rusiyanın Federal Təhlükəsizlik Xidməti (FSB) Adolf Hitlerin ölümü ilə bağlı uzun illər məxfi saxlanılan yeni arxiv sənədlərini ictimaiyyətə açıqlayıb.

Publika.az xəbər verir ki, sənədlərdə Berlinin müdafiəsinə rəhbərlik etmiş nasist generalı Helmut Veydlinqin sovet hərbçilərinə verdiyi ifadələr yer alıb.

Açıqlanan materiallara görə, Adolf Hitler 1945-ci il aprelin 30-da Berlində yerləşən bunkerdə intihar edib. Həmin vaxt şəhər artıq Sovet ordusunun tam mühasirəsində idi və Üçüncü Reyxin süqutu qaçılmaz sayılırdı.

FSB-nin yaydığı sənədlərdə qeyd olunur ki, Hitlerin ölüm xəbəri nasist rəhbərliyi tərəfindən maksimum gizli saxlanılıb. General Veydlinq ifadəsində bildirib ki, bu barədə məlumat verilən yeganə şəxs SSRİ rəhbəri İosif Stalin olub.

Materiallarda göstərilir ki, Hitlerin ölümündən sonra onun yaxın çevrəsi vəziyyətin tam nəzarətdən çıxdığını anlayıb. Nasist rəhbərliyində xaos yaranıb, bəzi yüksək vəzifəli şəxslər qaçmağa çalışıb, digərləri isə Sovet ordusuna təslim olub.

Sənədlərə əsasən, Hitler intihar etməzdən əvvəl siyasi vəsiyyətini hazırlayıb, Almaniyanın gələcək rəhbərliyi ilə bağlı tapşırıqlar verib. Daha sonra isə bunkerdə Eva Braunla birlikdə həyatına son qoyub. Onların cəsədlərinin yandırılması əmri də əvvəlcədən verilib.

FSB tərəfindən dərc olunan ifadələrdə Berlin uğrunda son döyüşlərin təfərrüatları da yer alıb. Veydlinq bildirib ki, şəhərin müdafiəsi faktiki olaraq çökmüşdü və Almaniya ordusunun müqaviməti davam etdirməsi artıq mümkünsüz idi.

Tarixçilərin fikrincə, SSRİ uzun illər Hitlerin taleyi ilə bağlı müxtəlif versiyaların yayılmasına şərait yaradıb. Bunun səbəbi həm siyasi məqsədlər, həm də müharibədən sonrakı informasiya mübarizəsi olub. Müasir araşdırmalar isə Hitlerin bunkerdə intihar etdiyini əsas versiya kimi qəbul edir.

Müəllif: Adəm