Rusiya-Yaponiya gərginliyi artır: Putin Kuril adalarını “mübahisəsiz ərazi” elan etdi

Rusiya prezidenti Vladimir Putin Kuril adalarının statusunun İkinci Dünya müharibəsinin nəticələri və beynəlxalq sənədlərlə müəyyənləşdiyini bildirib.

Publika.az xəbər verir ki, Putin bu barədə Sakit Okean Donanmasının təlimləri zamanı danışıb.

Onun sözlərinə görə, Tokio arxipelaqın bir hissəsi üzərində Rusiyanın suverenliyini hələ də mübahisələndirir. Moskva isə 1945-ci ildən sonra formalaşan sərhədlərin müharibədən sonrakı reallıq olduğunu və yenidən nəzərdən keçirilməməli olduğunu hesab edir.

Yaponiya İturup, Kunaşir, Şikotan və Habomai adaları üzərində iddia edir və onları “şimal əraziləri” adlandırır. Bu ərazilər hazırda Rusiyanın Saxalin vilayətinin tərkibindədir.

Qeyd edilir ki, 1951-ci il "San-Fransisko Sülh müqaviləsi"ndə Yaponiya Kuril adaları və Saxalinin cənub hissəsinə olan hüquqlarından imtina edib. Lakin sənəddə bu ərazilərin hansı dövlətə verildiyi göstərilməyib. SSRİ isə müqaviləni imzalamayıb.

1956-cı il Sovet-Yaponiya Bəyannaməsi ilə iki ölkə arasında diplomatik münasibətlər bərpa olunub. Sənəddə sülh müqaviləsi bağlandıqdan sonra Şikotan və Habomai adalarının Yaponiyaya verilməsinin mümkünlüyü nəzərdə tutulsa da, Moskva ilə Tokio arasında belə müqavilə bu günədək imzalanmayıb.

Müəllif: Adəm