Rusiyada GÜCLÜ PARTLAYIŞ: alov kəndi cənginə aldı, yaralılar var - VİDEO

Rusiyanın Perm vilayətində qaz kəmərində güclü partlayış baş verib.

Publika.az xəbər verir ki, bu barədə "Shot" "Telegram" kanalı məlumat yayıb.

Bildirilib ki, partlayışdan sonra yaxınlıqdakı yük qatarının çənləri yanıb. Yanğın yaşayış binasına da keçib. Bundan sonra Kueda kəndi yaxınlığında böyük yanğın başlayıb.

Artıq üç evin yanaraq yararsız hala düşdüyü bildirilir.

Regionun qubernatoru Dmitri Maxonin bildirib ki, ikisi uşaq olmaqla 6 nəfər xəsarət alıb. Onların hamısı xəstəxanaya yerləşdirilib. Onlardan ikisi reanimasiyadadır.

Hazırda Fövqəladə Hallar Nazirliyinin əməkdaşları hadisə yerində işləyir. Yanğının söndürülməsi üçün içərisinə su çənləri və köpükləndirici maddə daxil olan yanğınsöndürən qatarı gətirilib.

180 kvadratmetr ərazini əhatə edən yanğının səbəbləri hələlik məlum deyil.

Fövqəladə halın dəmir yolu infrastrukturuna aidiyyatı yoxdur və qatarların hərəkətinə təsir göstərmir.

Hüseyn İbadlı