Ruhaninin Azərbaycana səfər proqramı açıqlanıb

Sabah İran İslam Respublikasının prezidenti Həsən Ruhani Azərbaycana səfərə gələcək.

Publika.az xarici mediaya istinadən xəbər verir ki, bu barədə İranın Prezident Administrasiyasının mətbuat xidmətinin rəhbəri Pərviz İsmaili bildirib.

O deyib ki, səfər çərçivəsində Həsən Ruhani Bakıda keçiriləcək İran, Azərbaycan və Rusiya prezidentlərinin üçtərəfli görüşündə iştirak edəcək.

P.İsmaili bildirib ki, avqustun 7-də İran və Azərbaycan prezidentləri - Həsən Ruhani və İlham Əliyev arasında ikitərəfli görüş də keçiriləcək: "Görüşdə iki ölkə arasında ticarət, iqtisadiyyat, sənaye, energetika, mədəniyyət, bank, konsulluq xidmətləri, rabitə və nəqliyyat sahəsində əldə olunmuş anlaşmaların icra prosesi araşdırılacaq və müxtəlif məsələlərlə bağlı fikir mübadiləsi aparılacaq. Səfər zamanı həmçinin, İrandan Azərbaycana texnologiyanın gətirilməsi ilə yanaşı, bir neçə sənaye mərkəzinin icra əməliyyatına start veriləcək".

P.İsmaili qeyd edib ki, Bakıda İran və Rusiya prezidentləri – Həsən Ruhani ilə Vladimir Putin arasında da ikitərəfli görüşün keçirilməsi nəzərdə tutulur: "Bu görüşdə də iki ölkəni maraqlandıran məsələlər barədə ətraflı fikir mübadiləsi aparılacaq".

P.İsmaili prezident Həsən Ruhaninin Azərbaycana səfəri zamanı onu bir neçə nazir və yüksək vəzifəli dövlət rəsmilərinin müşayiət edəcəyini söyləyib.

Vasif Həsənli