Müsavatdakı hadisələri Fransa terroruna bənzətdi, ara qarışdı

Müsavat Məclisinin keçmiş üzvü Hikmət Hacızadə Fransada “Charlie Hebdo” jurnalına edilən hücumla qurultaydan sonra Müsavat daxilindəki prosesləri eyniləşdirib.

Publika.az xəbər verir ki H. Hacızadə Fransada karikaturaya görə törədilən dəhşətli qətliamı qətiyyətlə pisləyir.

“Bir qeydim də var. Az adam fikir verdi ki, Parisdəki bu hadisə ilə Müsavatda ifadə azadlığına görə cəzalar eyni mahiyyətdədir. Sözə, ifadəyə görə cəza olmamalıdır - budur demokratik dünyanın son qənaəti”, - deyə o bildirib.

H. Hacızadə Arif Hacılıya qarşı çıxdığı üçün partiyadan çıxarılan Səxavət Əlisoyu Müsavatda söz azadlığının boğulmasına nümunə kimi göstərib.

Müsavat Mərkəzi İcra Aparatının rəhbəri Gülağa Aslanlı Publika.az-a açıqlamasında H. Hacızadəyə etiraz edib. O, H. Hacızadənin yanaşmasını mənasız və biabırçı adlandırıb.

“Səxavət Əlisoy nizamnaməyə uyğun olaraq partiyadan çıxarılıb. Burda hər-hansı söz azadlığının boğulması hallarından söhbət gedə bilməz. Müsavatda baş verənləri Fransadakı hadisələrlə eyniləşdirmək hansı düşüncədən irəli gəlir? Bu yanaşmanı irəli sürən adama cavab verməyi özümə rəva görmürəm”, - deyə o bildirib.

Asif Nərimanlı