Bolqarıstanlı mütəxəssis: "Seçki Azərbaycan xalqının iradəsini ifadə etdi"

Bolqarıstanın Azad və Demokratik seçkilər uğrunda Vətəndaş Təşəbbüsü (GİSDİ) təşkilatı Azərbaycanda aprelin 11-də keçirilən prezident seçkiləri ilə bağlı bəyanat verib.

Publika.az xəbər verir ki, GİDSİ-nin Azərbaycanda keçirilən prezident seçkilərinin müşahidəsi üzrə seçki müşahidə missiyasının rəhbəri Mixail Mirçev bildirib ki, seçki kompaniyası və seçki günü aparılan müşahidələr və seçki nəticələri qaydalara uyğundur:

"Seçkiqabağı kampaniya ilə bağlı martın 29-da Aralıq Hesabatı təqdim etmişik. Seçki günü seçki prosesi normal təşkil edilmişdi. Seçicilərə təzyiq göstərilməsi müşahidə edilməyib. Seçki idarəetmə orqanları və ya daha aşağı instansiya komissiyalarına - Dairə Seçki Komissiyalarına qarşı ictimai nümayiş halları baş verməyib. GİDSİ-nin müşahidəçiləri heç bir problem olmadan məntəqələrə daxil olublar. İlkin faktlar və nəticələrə əsasən belə qənaətə gəlirik ki, seçki qutularının möhürlənməsi ilə bağlı heç bir pozuntu qeydə alınmayıb".

Mixail Mirçevin sözlərinə görə, səsvermə prosesi şəffaf keçib, səsvermə kabinəsindən kənarda səsvermə halları müşahidə edilməyib:

"Qutulara topa bülletenlərin atılması və ya bir seçicinin bir neçə seçicinin yerinə səs verməsi cəhdləri müşahidə edilməyib. Səsvermə məntəqəsinin heyət üzvləri və digər rəsmilər tərəfindən seçicilərə hansısa namizədə səs vermələri ilə bağlı təzyiqin göstərilməsi halları qeydə alınmayıb, hansısa namizədin xeyrinə təbliğatın aparılması müşahidə edilməyib. Səsvermə prosesinə kənar müdaxilələr olmayıb. Səslərin hesablanması prosesi şəffaf aparılıb. Bu proses zamanı heç bir ciddi qanun pozuntuları qeydə alınmayıb. Ümumilikdə seçki prosesi şəffaf aparılıb və seçki nəticələrinə mümkün təsir edə biləcək ciddi qanun pozuntuları müşahidə edilməyib. Beləliklə, GİDSİ belə qənaətə gəlir ki, 11 aprel prezident seçkiləri beynəlxalq standartlara uyğun keçirilib və Azərbaycan xalqının iradəsini ifadə edir".

Könül