Bu adamlar sanki bir alətə çevriliblər – ŞƏRH

Azərbaycanda və xaricdə yaşayan soydaşlarımız daha yaxşı olardı ki, ölkəmizin xeyrinə, gələcəyi naminə, Azərbaycan dövlətinin möhkəmlənməsi, beynəlxalq aləmdə nüfuzunun artması naminə təbliğat aparsınlar.

Publika.az-a açıqlamasında bu sözləri millət vəkili Elman Məmmədov anti-milli qruplar və onların xaricdəki havadarlarının Mehman Hüseynov hadisəsindən Azərbaycanın əleyhinə növbəti kampaniya başlamaq üçün fürsət kimi istifadə etməsini şərh edərkən deyib.

“Aydındır ki, xaricdə müəyyən qüvvələr Azərbaycan əleyhinə müəyyən anti-kampaniyalar aparırlar. Bu, başadüşüləndir, onların Azərbaycana qarşı məkrli niyyətləri var. Ancaq soydaşlarımızın Azərbaycanımız haqqında xoşagəlməz hərəkətlər etməsi, bəyanatlar yayması, kampaniyalar təşkil etməsi təbii ki, xoşagələn hal deyil və çox güman ki, onlar bunu müstəqil etmirlər, onları bu çirkin məqsədlər üçün təşkilatlandıran, məlumatlandıran qüvvələr var”, - Elman Məmmədov qeyd edib.

Onun sözlərinə görə, heç bir Azərbaycan vətəndaşı maddi, yaxud da hansısa maraqlar naminə anti-milli qrupların əllərində öz ölkəsinə qarşı istifadə olunan alətə çevrilməməlidir.

“Çox təəssüf ki, xaricdə belə qüvvələr mövcuddur. Onların yaşadıqları dövlətlərdə Azərbaycanı sevməyən, Azərbaycana qarşı daim şər-böhtan xarakterli kampaniyalar aparan xüsusi qurumlar, təşkilatlar, xüsusi xidmət orqanları var. Bu adamlar onların əlində sanki bir alətə çevriliblər. Bunları Azərbaycana qarşı istiqamətləndirirlər, belə xoşagəlməz kapmaniyalar yaradırlar”, - millət vəkili bildirib.