Ərdoğan Barzani ilə bu məsələləri müzakirə etdi - FOTO

Türkiyə Prezidenti Rəcəb Tayyib Ərdoğan İraq Kürd Muxtar Regionunun rəhbəri Neçirvan Barzanini Prezident Sarayında qəbul edib.

Publika.az xəbər verir ki, qəbul zamanı Türkiyə-İraq münasibətləri, İKMR ilə əməkdaşlıq və regional inkişaf müzakirə olunub.

Ərdoğan görüşdə bildirib ki, Türkiyə bölgədə sülh və sabitliyi hədəfləyir, İraqın zorakılıq girdabından uzaq tutulması kritik əhəmiyyət daşıyır və İKMR-nin bu istiqamətdə atdığı addımları izləyir.

Türkiyə lideri İraqda keçiriləcək Nümayəndələr Məclisi seçkilərinin bütün İraq xalqı üçün xeyirli olmasını arzuladığını və İraqın sülh və təhlükəsizliyini ölkəsində ayrı görmədiyini vurğulayıb.

O, İraq Mərkəzi Hökuməti ilə İKMR arasında neft sahəsində əldə olunan razılaşmanı məmnuniyyətlə qarşıladığını və “İnkişaf Yolu” layihəsi ilə bağlı razılaşmanın yaxın zamanda əldə olunmasının bütün bölgənin mənafeyinə uyğun olacağını qeyd edib.

Türkiyə Prezidenti "Terror olmayan Türkiyə” prosesinin uğurla nəticələnməsində qərarlı olduqlarını və İKMR-nin Suriyanın ərazi bütövlüyü və birliyinə verdiyi dəstəyin davam etməsini vacib hesab etdiklərini bildirib.

Görüşdə Ərdoğanı Milli Kəşfiyyat Təşkilatının rəhbəri İbrahim Kalın, Prezidentin Kommunikasiya rəhbəri Burhanettin Duran və Prezidentin Xarici Siyasət və Təhlükəsizlik üzrə Baş müşaviri Akif Çağatay Kılıç müşayiət ediblər.

Hüseyn İbadlı