İrəvanda narahatdırlar: Ermənistanda əhali sürətlə azalır, Azərbaycanda isə...

Ermənistan demoqrafik problemlərini həll etmək üçün təcili addımlar atmalıdır. Əks halda, əhalinin hazırkı artım tempi davam edərsə, 2040-cı ilə qədər ölkə əhalisinin sayı 2,5 milyon nəfərdən aşağı düşə bilər.

Publika.az xəbər verir ki, bunu iqtisadçı ekspert Suren Parsyan “Körpü” vətəndaş təşəbbüsü və “Ermənistan mənəm” ümumerməni təşəbbüsünün təşkil etdiyi sosial-iqtisadi çağırışların müzakirəsində bildirib.

Parsyan qeyd edib ki, Ermənistanda son 2-3 ildə əcnəbilərin köçürülməsi və Qarabağdan gələn ermənilərin sayəsində əhalinin sayı artıb. Lakin bu, özünü müvəqqəti göstərdi: köçürülmüş əhali praktiki olaraq ölkəni tərk edib, Qarabağdan gələn 100 min nəfərin isə təxminən 20 mini artıq Ermənistanı tərk edib.

Ekspertin fikrincə, məcburi köçkünlərin ölkəni tərk etməsinin əsas səbəbləri sosial-iqtisadi çətinliklər və qeyri-sabit təhlükəsizlikdir.

"İnsanlar layiqli həyat şəraitini təmin edə bilmədiklərinə və özlərini təhlükəsiz hiss etmədiklərinə görə ölkəni tərk edirlər. Ermənistanın ən qiymətli sərvəti onun insanlarıdır. Bununla belə, biz ciddi demoqrafik problemlərlə üzləşirik: əhalinin qocalması, doğum səviyyəsinin azalması və miqrasiyanın yüksək səviyyəsi", - Parsyan vurğulayıb.

İqtisadçı xəbərdarlıq edib ki, əhalinin azalması ölkə üçün təkcə sosial deyil, həm də strateji problemdir. Xüsusilə regionun mürəkkəb geosiyasi mühitində demoqrafik göstəricilər təhlükəsizlik məsələləri ilə birbaşa bağlıdır.

O qeyd edib ki, insan kapitalı regionda təhlükəsizliyin təmin edilməsi üçün həlledici əhəmiyyətə malikdir. Azərbaycanın əhalisi 10 milyona çatıb, Türkiyənin əhalisi 100 milyona yaxınlaşır, İranınki isə 80 milyonu ötüb.

Parsyanın fikrincə, hökumətin prioriteti əhalinin saxlanması və köçkünlərin inteqrasiyası üçün əlverişli şərait yaratmaq olmalıdır. Bunun üçün davamlı sosial-iqtisadi proqramlar, əsas təhlükəsizlik təminatları və doğum nisbətinin stimullaşdırılması tələb olunur.

Xatırladaq ki, 2025-ci ilin yanvar-avqust aylarında Ermənistanda 20 437 körpə doğulub ki, bu da 2024-cü ilin eyni dövrü ilə müqayisədə (21 821) 1 439 azdır. Eyni dövrdə ölənlərin sayı ötən illə müqayisədə 138 nəfər artaraq 17 210 nəfərə çatıb.

Tural