"Qanunvericilikdə bəzi dəyişikliklərə ehtiyac var"

"Əlilliyi olan şəxslərə övladlığa verilmə ilə bağlı mövcud qanunvericilikdə bəzi dəyişikliklərə ehtiyac var".

Publika.az xəbər verir ki, bu sözləri Əmək və Əhalinin Sosial Müdafiəsi Nazirliyinin Əlillərin sosial müdafiəsi siyasəti şöbəsinin müdiri Sabir Qocayev “Övladlığagötürmə sahəsində idarəetmənin təkmilləşdirilməsi” mövzusunda mətbuat konfransında çıxışı zamanı deyib.

Onun sözlərinə görə, BMT-nin bu istiqamətdə mövcud konvensiyası ilə bağlı əlilliyi olan şəxslərin hüquqları üzrə komitəsinin artıq Azərbaycan hökumətinə sualları daxil olub.

“Həmin suallar içərisində bir sual Nazirlər Kabiteninin 172 saylı qərarında olan övladlığa uşaq götürmək istəyən şəxslərin xəstəliklərə dair tələbidir. Mövcud qanunvericiliyə görə müəyyən əlilliyi olan şəxslər uşaq götürə bilməzlər. Xüsusən də, əsas məsələ birinci, ikinci qrup əlilliyi olan şəxslərə bu məhdudiyyətin qoyulmasıdır. Bu, təbii ki, həmin şəxslərə ayrı-seçkilikdir. Belə bir yanaşma da var ki, uşağın valideynlərindən biri vəfat edirsə və digər valideyni birinci və ya ikinci qrup əlilliyi olan şəxsdirsə, uşaq valideyn himayəsindən məhrum edilmiş hesab olunur. Biz həmin bəndin o şəxslərə qarşı diskriminasiya olduğunu hesab edirik və bu bəndlər sistemdən çıxarılacaq.Yeni sistemdə yanaşma dəyişəcək. Beynəlxalq təcrübəyə əsaslanaraq xəstəliyin şəxsin həyatını nə dərəcədə məhdudlaşdırdığı əsas götürüləcək”.

Gülxar