Nida.az

Sabiq deputat Serj Sarkisyanın cəzalandırılmasını tələb etdi

25 Fevral 2014 16:23

“Xocalı faciəsinin təşkilatçısı olan 12 nəfər buna görə indiyədək heç bir cəza almayıb”. Bunu Publika.Az-a açıqlamasında “Dağlıq Qarabağ bölgəsinin Azərbaycanlı İcması” İctimai Birliyinin İdarə Heyətinin üzvü, sabiq deputat Həvva Məmmədova bildirib.

Dünyada türk dünyasına qarşı ikili standartların olduğunu vurğulayan H.Məmmədova deyib ki, hələlik erməni lobbisi dünyada Xocalı soyqırımının ədalətli qiymət almasına imkan vermir. Onun sözlərinə görə, bu gün Ermənistan hakimiyyətində rəhbər vəzifələrdə təmsil olunan şəxslərin cəzasız qalması da erməni lobbisinin bir fəaliyyətidir: “Təkcə Serj Sarksiyanın müsahibələri zamanı törətdiyi cinayətlərlə bağlı etirafı onun beynəlxalq məhkəməyə verilməsinə imkan yaradır. Bu insanlar nə qədər ki, cəzasını çəkməyib, bizim görəcəyimiz işlər hələ çoxdur. Biz dünyada gedən prosesləri izləyib görməliyik və mübarizəmizi sonadək davam etdirməliyik”.

Vasif Həsənli