Şakira: “Dünya Çempionatı həyatımı tamam dəyişdi”

Braziliyada keçirilən futbol üzrə dünya çempionatının bağlanış mərasimində Şakira da iştirak edib. Müğənni Rio de Janeyronun “Marakana” stadionunda Argentina-Almaniya matçından qabaq “La La La” mahnısını ifa edib.

Şakira jurnalistlərə müsahibə verərək dünya çempionatının onun həyatını dəyişdiyini etiraf edib: “Sevgimi futbol üzrə dünya çempionatında tapdığımı heç bir zaman unutmaram. Dünya çempionatı olmasa, oğlum da olmazdı”.

Qeyd edək ki, Şakira oğlunun atası və sevgilisi olan ispan futbolçusu Jerar Pike ilə 2010-cu ildə CAR-da keçirilən dünya çempionatında tanış olub. Onda Şakira mərasimin rəsmi himni olan “Waka Waka-Time for Africa” mahnısını ifa edib. O, ilk dəfə 2006-cı ildə Almaniyada keçirilən dünya çempionatında çıxış edib. Artıq 3-cü dəfədir ki, kolumbiyalı gözəlçə dünya çempionatının bağlanış mərasimində iştirak edir.

İspan yığmasının məğlubiyyətinə Pikenin münasibəti barədə suala isə belə cavab verib: “Onu sakitləşdirmək üçün mənim xüsusi yollarım var”.

Nura