Avropa

Orduda koronavirusa yoluxanları təlim keçən itlər təsbit edəcək

20 İyul 2020 11:52

Almaniya Silahlı Qüvvələri koronavirusa yoluxan şəxsləri təsbit etmək üçün itlərə təlimlər keçir.

Publika.az xəbər verir ki, Hannover Universitetinin Baytarlıq Fakültəsi və Ulmen Vulkaneifeldəki təlim mərkəzində aparılan birgə layihənin tamamlanmasına 3 həftə qalıb.

Silahlı Qüvvələrdən verilən açıqlamada itlərin narkotik və qoxunun molekulyar birləşməsindən xəstəlikləri qavrama qabiliyyətlərindən yola çıxaraq layihəyə başladığı bildirilib.

Hazırda laboratoriya mərhələsində olan layihənin 3 həftə sonra sınaq mərhələsinə keçəcəyi qeyd olunub.

Orduda xidmət edən 10 it üzərində aparılan sınaq və araşdırmalarda bu zamana qədər koronavirusa yoluxanların təsbitində 80% uğurlu nəticə əldə edildiyi açıqlanıb.

Qeyd edək ki, bənzər layihə daha əvvəl Böyük Britaniyada gerçəkləşdirilmişdi. İtlərin 1,5 saniyədə koronavirusa yoluxanları təsbit etmə qabiliyyətindən yararlanan İngiltərə hökuməti hava limanlarında onlardan istifadə etməyi nəzərdə tutub.

Zümrüd