Avropa

Almanlara ölümcül təhlükə barədə xəbərdarlıq edildi

29 Noyabr 2023 00:30

Almaniya hakimiyyəti ölkənin qərb bölgəsində yaşayan sakinlərə əlverişsiz hava şəraitinin ölümcül təhlükəsi barədə xəbərdarlıq edib.

Publika.az "Reuters"ə istinadla xəbər verir ki, almanlara evlərini tərk etməmələri ilə bağlı çağırış edilib.

Hava şəraitinin qəfil pisləşməsi yollarda hadisələrin sayının artmasına səbəb olub. Almaniyanın bir neçə bölgəsində qar fırtınası zamanı yolların sürüşkən olması və ağac budaqlarının aşması səbəbindən insanlar avtomobillərində sıxışıb. Reynqau-Taunus ərazisində yüzlərlə sürücü və sərnişin evakuasiya edilməli olub, daha 70 nəfər isə başqa yaşayış məntəqəsinin yaxınlığındakı yolda avtomobilindən düşə bilməyib.

Pis hava şəraiti iki sürücünün həyatına son qoyan qəzalara da səbəb olub. Qurbanlardan biri Baden-Vürtemberqdən olan 71 yaşlı kişidir. Polisin məlumatına görə, o, idarəetməni itirib və qarşıdakı zolağa çıxıb. Oxşar hadisə Reynland-Pfalzdan olan 54 yaşlı sürücü ilə də baş verib.

Hüseyn İbadlı