Müharibə sona çatır? - Keçmiş kəşfiyyat rəhbəri tarix açıqladı

Britaniyanın kəşfiyyat qurumu olan MI6-nın keçmiş rəhbəri Con Souers diqqət çəkən açıqlama verib.

Publika.az "Financial Times"a (FT) istinadən xəbər verir ki, o, Rusiya ilə Ukrayna arasında danışıqların bu il baş tutmayacağını deyib. Souersin sözlərinə görə sülh danışıqları yalnız gələn il başlaya bilər.

"Sülh müqaviləsinin 2027-ci ilin yazına qədər müzakirə edilməsi ehtimalı azdır",- "Financial Times" yazıb.

Keçmiş baş kəşfiyyatçının sözlərinə görə, proqnozlaşdırılan sərt qış və münaqişə tərəflərində hərbi, iqtisadi itkilərin artması kimi amillər 2027-ci ildə uğurlu danışıqların başlanması üçün şərait yarada bilər.

O qeyd edib ki, qarşıdakı aylarda da hər iki tərəfin zərər və problemləri artmağa davam etsə, 2027-ci ildə uğurlu atəşkəs danışıqları ehtimalı yaranacaq.

Eyni zamanda, Souers pessimist fikirlər də səsləndirib. Onun proqnozlarına görə, yaxın gələcəkdə davamlı sülhə nail olmaq mümkün olmayacaq. Hazırkı şəraitdə əldə edilə biləcək ən yaxşı uğur 2014-cü ildən sonrakı döyüş səviyyəsinə qayıtmaqdır.

Xatırladaq ki, bir neçə gün öncə "New York Times" (NYT) qəzeti də oxşar mövzuda məqalə dərc etmişdi. Məqalədə Ukraynadakı münaqişənin "eskalasiya spiralına" girməsi xüsusi vurğulanmış və ekspertlər, diplomatlar ciddi sülh danışıqlarının 2027-ci ilin yazına və ya yayına qədər başlamayacağını demişdilər.

Müəllif: Tural