Bu sorğu Mertsi şoka saldı: AfD Şərqi Almaniyada 45 faiz səs "götürdü"

Almaniyanın müxalifətçi “Almaniya üçün Alternativ” (AfD) partiyası ölkənin şərq torpaqlarında kansler Fridrix Mertsin rəhbərlik etdiyi Xristian Demokrat İttifaqı/Xristian Sosial İttifaqı (XDİ/XSD) blokunu böyük fərqlə qabaqlayır.

Publika.az xəbər verir ki, RTL və N-TV üçün Forsa institutunun keçirdiyi sorğuya əsasən, yalnız Şərqi Almaniya sakinləri səs versəydi, AfD 45 faiz, hakim XDİ/XSD bloku isə cəmi 12 faiz səs toplayardı. Bununla da hakim blok üçüncü yerdə qalardı. “Sol” partiyası isə 15 faizlə ikinci yeri tutardı.

Sorğuda iştirak edən şərqi almanların yalnız 7 faizi Mertsin kansler kimi fəaliyyətini müsbət qiymətləndirib. Respondentlərin 91 faizi isə onun fəaliyyətindən narazı olduğunu bildirib.

Araşdırma sentyabrın 1-dən 7-dək 2502 nəfər arasında keçirilib. Statistik xəta 2,5 faiz bəndindən çox deyil.

Qeyd edək ki, ötən həftəsonu AfD Saksoniya-Anhalt əyalət parlamentinə seçkilərdə 43,8 faiz səs toplayaraq rekord nəticə göstərib. Bu, partiyanın Almaniya regionlarında indiyədək əldə etdiyi ən yüksək göstəricidir.

Merts XDİ-nin seçkidəki məğlubiyyətini etiraf edib. Kanslerin reytinqinin iqtisadi siyasət və hərbi xərclərə üstünlük verilməsi fonunda sürətlə aşağı düşdüyü bildirilir.

Müəllif: Adəm