Yay mövsümündə bu naxışlar göz oxşayacaq - FOTOLAR

Bu il bizi rəngarəng, çılğın bir yay gözləyir. Ən azından məşhur moda evlərinin təqdim etdikləri kolleksiyalar bunu deməyə əsas verir. Lakin dəbli görünmək üçün ilin rəng çalarlarını bilmək kifayət etmir.

Publika.az sizin üçün mövsümün ən trend naxışlarını araşdırıb. Bu tövsiyələrdən xəbərdar olmadan alış-verişə çıxmayın!

Çiçək naxışı

Bu naxışları ayaqqabıdan günəş eynəyinə, çantadan pencəyə kimi hər yerdə görə biləcəyik. “Dolce&Gabbana”nın günəş eynəkləri, “Sophia Webster”in klatçları, “Gucci”nin dəri pencəkləri, “Fendi”nin isə hündürdaban ayaqqabıları “çiçək açacaq”.

Heyvan naxışları

Heyvan naxışları və fiqurları bu il heç olmadığı qədər populyardır. Artıq həyatımızın bir parçasına çevrilən leopard və piton naxışları ilə yanaşı bu il fil, at, şir, pişik və zürafə naxış və fiqurları da qarşımıza çıxacaq. “Versace”, “Roberto Cavalli”, “Gucci” və “Valentino” kimi məşhur markaların kolleksiyalarında heyvan detalları yer alıb. Odur ki, siz də bu yay heyvan fiqurlarına şans verə bilərsiniz.

Həndəsi, nizamsız cizgilər

İncə və ya qalın, eninə və ya uzununa – fərqi yoxdur, bu il cizgilər olduqca dəbdədir. Xüsusilə də, üzərində həndəsi fiqurlar və nizamsız cizgilər olan çantalar küçə stilinin əsasını təşkil edəcək. Belə geyim və aksessuarları sadə parçalarla uyğunlaşdırmaq lazımdır. Odur ki, başdan ayağa həndəsi fiqurlara bürünməyi ağlınızdan belə keçirməyin.

“Tie‐dye” naxış

Bu rəngarəng naxışı çimərlik geyimlərində, çantalarda, hətta pencək və ətəklərdə də görmək olacaq. Bu il “Emilio Pucci” markasının kolleksiyasında əsasən belə naxışlı geyimlər yer alıb.

Dama-dama

Bu naxış ötən il də xeyli sevilmişdi. 2016-cı ilin yay mövsümündə yüksəlişini davam etdirəcək. Dəbli görünmək istəyirsinizsə, dama-dama parçadan tikilmiş, parlaq rəngli geyimlər alın. Qırmızı rəng isə ən yaxşı seçim hesab edilə bilər.

Ləman Sultan