Prezident qızından SÜRPRİZ QƏRAR

ABŞ Prezidenti Donald Trampın qızı İvanka Tramp öz adını daşıyan geyim və ayaqqabı markasını bağlamağa qərar verib.

Publika.az xarici mətbuata istinadən xəbər verir ki, İ.Tramp qərarı haqqında açıqlama yayıb.

“Bu markanı ilk yaradanda heç kim təxmin edə bilməzdi ki, bu qədər uğur qazanacağıq. Vaşinqtonda 17 ay yaşadıqdan sonra əvvəlki iş həyatına nə vaxt qayıdacağımı bilmirəm. Lakin yaxın gələcəyə qədər Vaşinqtonda qalacağımı dəqiq bilirəm. Odur ki, bu qərarı vermək həm mənim üçün, həm də komandam üçün ən ədalətlisi olacaq", - deyə İvanka bildirib.

Xatırladaq ki, 4 il əvvəl qurulan şirkət qısa müddətdə böyük markalarla rəqabətə girmişdi.

Tramp Ağ Evdəki vəzifəsinə başladıqdan sonra ABŞ-dakı pərakəndə mağaza zənciri Nordstrom "Ivanka Trump" markasına aid məhsulların satışını dayandırmışdı. Ötən həftə isə Kanadanın ən böyük pərakəndə satış mağazası “Hudson Bay” satış həcmindəki azalmanı əsas göstərərək prezident qızının "Ivanka Trump" markasının məhsullarını siyahısından çıxarmışdı.

Qeyd edək ki, İvanka əvvəllər “Trump” ailə şirkətlərinin inkişafı üzrə vitse-prezidenti vəzifəsini icra edib. 2017-ci ilin martın sonlarında isə o, atasının əvəzsiz məsləhətçisi kimi çıxış edir.