Qarabağ kolleksiyası Rusiyanın məşhur şousunda - VİDEO

Azərbaycanlı dizayner Rüfət İsmayılın “Sumax” adlı kolleksiyası Rusiyanın aparıcısı Aleksandr Vasilyev olduğu “Modnom Priqovere” verilişində nümayiş olunub.

Publika.az xəbər verir ki, Dizaynerin kolleksiyasının təqdimatında baş model Günay Musayeva olub. Dünya şöhrətli dizayner bildirib ki, bu kolleksiya onun üçün xüsusilə dəyərlidir:

"Bu kolleksiyada biz xalça ornamentlərindən istifadə etmişik, çox mürəkkəb əl işləridir, onun üzərində 4-5 ay işləmişik. Bu prosesə çoxlu işçi cəlb olunmuşdu. Hesab edirəm ki, nəticədə çox gözəl iş alınıb. Burada həm Qarabağ, həm də digər bölgələrin xalça naxışları yer alıb. Hər xalça naxışlarına çox ehtiyatla yanaşır və özəlliyini itirməməsinə çalışırdı".

O, aparıcının "Sizin üçün qəlbləri fəth edən müasir qadın necə olmalıdır" sualına isə belə cavab verib: "O, zövqü olan güclü bir qadındır. O, diqqət mərkəzində olmağı xoşlayır, bununla bərabər özünü çox komfortlu hiss edir".

Qeyd edək ki, “Sumax” kolleksiyasında R. İsmayıl Azərbaycan xalçalarından, o cümlədən Qarabağdan ilhamlanıb. Kolleksiya ilk dəfə 2021-ci ilin oktyabr ayının əvvəlində Parisdə Moda Həftəsi çərçivəsində təqdim olunub.