Dəb

Dünya şöhrətli dizaynerdən İLK

7 İyul 2022 14:30

“Elie Saab” moda evi ilk dəfə kişi kolleksiyasını nümayiş etdirib. Göründüyü kimi, moda evinin kişilər üçün hazırladığı kolleksiya qadın geyimlərindən heç də az dəbdəbəli deyil.

Publika.az xarici mətbuata istinadən xəbər verir ki, livanlı məşhur dizayner Elie Saab yeni kolleksiyası üzərində işləyərkən ilk dəfə kişi geyimlərinə də yer verib. Onun komandası orqanza, şifon, atla və ipək üzərində muncuq, biser, lələklər və bədii tikmələrdən istifadə edərək ustalıqla dəbdəbəli axşam kostyumları yaradıblar. Elie Saabın yaradıcılıq prosesinin nəticəsi Parisdə keçirilən Moda Həftəsində nümayiş etdirilib.

Ənənəsinə sadiq qalan “Elie Saab” kolleksiyası dramatikliyi və dəbdəbəli teatrallığı ilə seçilib. Debüt kişi kutyür xəttinin nümayişində dizaynerin kişi geyimləri ilə yanaşı zəngin əl tikmələri ilə bəzədilmiş qadın ziyafət libasları da göstərilib.

“COVID-19-dan əvvəl də kişilər qadınlar kimi azad olmaq, özlərini sərbəst ifadə etmək arzusunda idilər”, - Saab kolleksiyası ilə çıxışında deyib.