Dəb

Fəslin ən dəbli kombinasiyası - FOTO

22 Sentyabr 2022 19:22

Çoxqatlı geyim stilini bir çoxumuz sınamağa ehtiyat edirik. Bu barədə sosial şəbəkələrdə nə qədər mətn olsa da, dəb tənqidçiləri və stilistlər nə qədər məsləhətlər versə və uğurlu nümunələr təqdim olunsa da, hələ də suallar yaranır. “Qat-qat geyinəndə hansı qaydalara əməl etməliyik ki, “kələm” kimi və ya kök görünməyək” sualı gündəmdən düşmür. Bu mövzuda hələ çox sual olduğundan sözügedən trendi yavaş-yavaş sınamağı məsləhət görürük. Problemsiz və hazır versiyalardan başlamaq yaxşıdır. Onlardan biri - vodolozka ilə “soroçka”nın birləşməsidir.

Publika.az xəbər verir ki, köynəklərin altında trikotaj vodolazka geyinmək payızın ən son trendləri arasında yer alır.

Köynəklə vodolozka birləşməsi bir güllə ilə iki quşu öldürür. Birincisi, o, sadəcə möhtəşəm görünür, obraza orijinallıq və mürəkkəblik əlavə edir. İkincisi, vodolozka sizi istənilən soyuq və küləkli havada isti saxlayacaq. Ümumiyyətlə, stil və praktiklik bir yerdədir. Və bu iki qat heç bir narahatlıq olmadan bir-biri ilə mükəmməl harmoniya yaradır.

“Louis Vuitton”, “The Row”, “Alaïa”, “Lemaire” və bir çox demokratik brendlər payız-qış şoularında bu kombinasiyaya müraciət ediblər. Üstəlik belə bir kombin üçün əlavə alış-verişə gərək yoxdur, bütün komponentlər artıq qarderobunuzda var. Əgər özünüzü rahat hiss edirsinizsə, onda əlavə qatlar da qadağan deyil. Məsələn, bir gödəkçə, pencək və ya jilet mükəmməl uyğunlaşacaq. Xoşbəxtlikdən bütün bunlar da trenddədir.