Dəb

Şahzadənin toyu oldu - FOTO/VİDEO

13 Mart 2023 16:38

Martın 12-də Kral II Abdullah və Kraliça Raniyanın böyük qızı və ikinci övladı, İordaniya şahzadəsi - II İman Abdullahın nişanlısı Cəmil Aleksandr Termiotislə toyu olub.
Publika.az xəbər verir ki, bu barədə "ArabNews" məlumat yayıb. Qeyd olunub ki, toy mərasimi Əmmandakı Beyt Əl-Urdon sarayında baş tutub. Nikah mərasimi isə televiziyada canlı yayımlanıb.

Şərq standartlarına görə, toy bir qədər təvazökar qaydada keçirilib. Məsələn, gəlinin buketi Bruney Sultanının qızı kimi qızıl və brilyantdan deyil, təzə çiçəklərdən hazırlanıb. Böyük qardaş və taxt-tacın varisi vəliəhd Hüseyn İmanı çiçəkli bir bağdan keçirərək, onu qonaqların gözlədiyi saraya aparıb. Valideynləri ilə salamlaşan gəlin daha sonra nişanlısı ilə divanda əyləşib. Nikah mərasimini molla icra edib. Bir-birlərinə sevgi andı içən cütlük nikah bağlamağa razı olduqlarını bildirdikdən sonra nikah şəhadətnaməsinə qol çəkiblər. Rəsmi hissə bitdikdən sonra gəlinlə bəy əsas zala gedib.

Şahzadənin, qolları uzun gəlinliyini "Dior" moda evi hazırlayıb. Lakin obrazın əsas detalı anası Kraliça Ranianın brilyant tacı olub. "Chaumet" zərgərlik brendinin imzasını daşıyan bu tac əvvəllər kral II Abdullahın anasına məxsus olub.

Qeyd edək ki, İmanın həyat yoldaşı nüfuzlu biznesmendir, o, 2015-ci ildə təsis etdiyi vençur kapitalı fondunun idarəedici tərəfdaşıdır. Toydan əvvəl o, adını şərti olaraq dəyişərək Cəmil seçib. Aleksandr Termiotis 1994-cü ildə Venesuelanın paytaxtı Karakasda anadan olub. Anası Korina Hernandez venesuelalı rəssam və fotoqraf, atası Aleksandros Termiotis isə yunan əsillidir. Onun babası 1952-ci ildə Karakasdakı Qalipan ticarət mərkəzində ilk "Dior" butikini açan iş adamı olub. Ola bilsin ki, İmanın gəlinlik seçimi də bununla bağlıdır, yeri gəlmişkən, kraliça Raniyə də bu moda evindən geyinib.