88 yaşlı dizaynerin yeni kitabı nəşr olunacaq

88 yaşlı italyan dizayner Corcio Armaninin eyniadlı brendinin 40 illik yubileyi şərəfinə "Per Amore" (Sevgi üçün) avtobioqrafiyası buraxılacaq.

Publika.az xarici mediaya istinadən xəbər verir ki, bu, onun 2015-ci ildə nəşr olunmuş illüstrasiyalı cildinin davamı olacaq. Kitaba dizaynerin məşhur dostları və modellərlə çəkdirdiyi şəxsi fotoları da daxildir. Yeni nəşrdə Armaninin həyat hekayələri daha genişləndirilmiş versiyada təqdim olunacaq.

"Mən həm yumşaq, həm də təxribatçı bir başlıq seçdim ki, bu da xarakterimi gözəl əks etdirir. Mən praqmatik və rasionalam, əsas odur ki, bütün davranışlarım ürəkdən gəlir. Buna görə də bir-birindən fərqli fikirlərin yer aldığı kitaba "Sevgi üçün" adı verilib", - dizayner bildirib.

Kitabda Armani özünü "yalnız danışan deyil, işləri yerinə yetirən bir insan" olaraq təyin edir.

Modelyer hazırda eyniadlı şirkətinin direktorlar şurasının sədri, baş icraçı direktoru və kreativ direktoru vəzifələrini tutur. Qlobal brendin 2022-ci ildə satışları 2,35 milyard avro təşkil edib.