Harri və Meqan ən böyük moda evlərindən birinin siması olacaq

Bu yaxınlarda "Spotify"la müqaviləsi ləğv olunan Meqan Markl pul qazanmağın və dağılmış reputasiyasını bərpa etməyin yeni yollarını axtarır.

Publika.az "Daily Mail"ə istinadən bildirir ki, Sasseks hersoginyası tezliklə "Dior" ilə böyük müqavilə imzalamağı planlaşdırır.

İddia olunur ki, "William Morris Endeavour" (WME) agentliyinin nüfuzlu və xarizmatik rəhbəri Ari Emanuel Meqan Marklın gələcək karyera yolu üzərində baş sındırır. O, "Netflix" və "Spotify" ilə qalmaqallar və uğursuz layihələrlə korlanmış reputasiyasını və Meqanın sarsılmış maliyyə vəziyyətini "Dior" ilə böyük müqavilənin köməyi ilə xilas etmək niyyətindədir.

"İndi hamı Meqan haqqında danışır. Artıq həftələrdir ki, onun "Dior" ilə müqavilə imzalayacağı ilə bağlı şayiələr dolaşır ki, bu da karyerasını bərpa etməyə kömək edəcək. Əgər o, bunun öhdəsindən gəlsə, onda heç kim onun kiçik podkastının bir mövsüm sonra ləğv edildiyini xatırlamayacaq", - adı açıqlanmayan mənbə bildirib.

WME agentliyi Meqan Markl üçün müxtəlif sahələrdə uğurlu gələcək şanslarını yüksək qiymətləndirir. "Biz bilirdik ki, "Spotify" tezliklə müqaviləni ləğv edəcək. Bu, hamı üçün şok ola bilər, lakin biz həftələrdir Meqanın rebrendi üzərində işləyirik. Korporativ sövdələşmələr və pul qazanmağa gəldikdə Ari biznesin ən yaxşısıdır. O, Meqanı təmsil etdiyi üçün həyəcanlanır və bütün enerjisini buna sərf edir. Təkliflər, o cümlədən digər podkast platformalarından da daxil olur”, - agentlik nəşrə bildirib.

"Arinin onu "Dior" kimi mürəkkəb tərəfdaşları ilə birləşdirəcək strateji və taktiki mübarizə planı olacaq. Bu, Meqanı keçmişin mənfiliklərindən uzaqlaşdırmaq üçün bir fürsətdir. Təsadüfi deyil ki, o, tac mərasiminə və Şahzadə Harri bu yaxınlarda Londonda olarkən onunla məhkəməyə getməyib. Meqan ərinin zəhərli dramlarından uzaqlaşmaqla ağıllı davranır. O, daim irəliləyən bir qadındır. Söhbət qlobal brend yaratmaqdan gedir. Tezliklə bir neçə əsas sövdələşmə elan ediləcək", - mənbə bildirib.

Xatırladaq ki, ötən gün Meqan Markl və Şahzadə Harrinin "Spotify" ilə əməkdaşlığı dayandırdıqları məlum olub. Sasseks hersoginyasının məşhur platformada müasir dünyada qadınların sıxışdırılması problemini qonaqlarla müzakirə etdiyi "Arketiplər" podkasti o qədər də uğurlu alınmadı və birinci mövsümdən sonra bağlandı. "Spotify"ın baş icraçı direktoru, podkast innovasiyaları və pul qazanma şöbəsinin rəhbəri Bill Simmons şounun epizodlarının sayı ilə bağlı öhdəliklərini yerinə yetirmədikləri üçün cütlüyü "lənətə gəlmiş fırıldaqçılar" adlandırıb. İndi isə reputasiya böhranı üzrə ekspert Erik Şiffer əmin edir ki, Meqan Markl komandası bu dramdan öz xeyrinə istifadə edəcək.