Dünya

Türkiyədə böyük əməliyyat – 2 tona yaxın narkotik ələ keçirildi

20 Noyabr 2015 11:22

Türkiyənin Daxili İşlər Nazirliyi Hatay bölgəsində psixotrop və narkotik maddələrin qanunsuz dövriyyəsi ilə bağlı xüsusi əməliyyat keçirib.

Publika.az-ın xarici mediaya istinadən verdiyi məlumata görə, əməliyyat Hatay vilayətinin 2 ayrı-ayrı bölgəsindəki 18 ünvanda reallaşdırılıb.

Xüsusi təlim görmüş itlərlə keçirilən əməliyyat zamanı Türkiyə tarixində indiyədək ən çox sayda narkotik həblər aşkar olunub. Məlum olub ki, aşkarlanmış həb formalı 7 milyon 326 min ədəd narkotik maddə Suriyada hazırlanaraq, Türkiyə üzərindən körfəz ölkələrinə çatdırılmalı imiş.

Hatayın digər bölgəsində keçirilən əməliyyat zamanı isə satış üçün nəzərdə tutulmuş 3 milyon 600 min ədəd həb formalı narkotik maddələr ələ keçirilib. Bununla da ələ keçirilən psixotrop maddələrin ümumi həcmi 10 milyon 926 min ədəd (1 ton 831 kiloqram) olub.

Əməliyyat zamanı 2 nəfər şübhəli saxlanılıb.

Vasif Həsənli