Sankt-Peterburqda anti-terror əməliyyatı başladı

Rusiya Federal Təhlükəsizlik Xidməti, Rusiya Qvardiyası və “Qrad” xüsusi təyinatlı dəstənin döyüşçüləri Sankt-Peterburq şəhərində yaşayış evlərindən birində federal axtarışda olan şəxslərin tutulması üçün əməliyyat keçirir.

Publika.az “İnterfaks” agentliyinə istinadən xəbər verir ki,bu haqda Federal Təhlükəsizlik Xidmətinin regional idarəsinin mətbuat xidmətindən bildirilib.

Yaşayış evində gizlənən şəxslər Şimali Qafqazda qanunsuz silahlı birləşmələrdə iştirakda ittiham olunur. Şahidlərin məlumatına görə, terrorçuların olduğu evdə iki partlayış baş verib.

Ev güllədeşməz jiletlər və kaskalar geyinən xüsusi təyinatlılar tərəfindən mühasirəyə alınıb.

Xüsusi əməliyyatın gedişatında üç döyüşçü saxlanılıb. “RİA-Novosti” xəbər agentliyinə bu haqda hüquq-mühafizə orqanlarındakı mənbə bildirib.

“Rəqəm hələlik qeyri-dəqiqdir. Ola bilər, onlar daha çox olsun. Həmçinin saxlanılanların vəziyyəti məlum deyil”, - mənbə qeyd edib.

Qeyd edilir ki, xüsusi əməliyyat Federal Təhlükəsizlik Xidmətinin Kabardin-Balkariya üzrə idarənin xahişi ilə keçirilir.

Ömər Dağlı