Dünya

Rusiyada işçi tapılmır: Rekord həddə yüksəlib

24 Aprel 2023 13:09

Rusiyada işçi qıtlığı rekord səviyyəyə qalxıb.

Publika.az "MK.ru"ya istinadən xəbər verir ki, 2023-cü ilin birinci rübünün nəticələrinə görə, Rusiya şirkətlərində işçi çatışmazlığı 1998-ci ildən bəri rekord həddə (mənfi 18 bal) çatıb. Bu barədə Mərkəzi Bankın “Müəssisələrin monitorinqi” sorğusunun məlumatında deyilir.

Tədqiqatın iştirakçıları iqtisadiyyatın qeyri-maliyyə sektorundan olan 14 min işəgötürən olub. Ən kəskin işçi çatışmazlığı istehsal müəssisələrində (mənfi 28 bal), sənaye müəssisələrində (mənfi 25 bal), su təchizatı təşkilatlarında (mənfi 23 bal), mədənçıxarma, daşıma və anbarda (hər biri mənfi 22 bal) müşahidə olunur.

Ən aşağı kəsir avtomobil satışı sektorunda (mənfi 10 bal), topdansatış ticarət və xidmət sektorunda (müvafiq olaraq mənfi 13 və mənfi 14 bal) qeydə alınıb.

Rusiya şirkətləri əmək haqlarının indeksləşdirilməsi və kadrların hazırlanması ilə problemi həll etməyə çalışırlar. Eyni zamanda emal sektorundan olan şirkətlər qeyd edirlər ki, maaşların artırılması problemi həll etmir, xüsusən də dar profilli mütəxəssislərdən söhbət gedir.

Mehti Kamiloğlu