Qadına bala it cildində görün nə satdılar - Hürüməyib, burnu isə...

Çində bir qadına bahalı bala it adı ilə tülkü balası satıblar.

Publika.az xəbər verir ki, bu barədə "Mirror" yazır.

Çinli qadının sözlərinə görə, küçük kimi aldığı ev heyvanının əslində tülkü olduğunu öyrəndikdə şoka düşüb. Qadın onun üçün təxminən 200 dollar ödəyib. Alıcı izah edib ki, satıcı bunun yapon şpitsi olduğuna dair onu inandırıb.

Lakin bir neçə ay sonra heyvanın sahibi qəribəliklər müşahidə etməyə başlayıb: "küçük" it yemi yeməyi dayandırıb, hürüməyib, burnu isə daha iti, tükləri daha sıx, quyruğu isə adi itlə müqayisədə nəzərəçarpacaq dərəcədə uzun olub.

Parkdakı digər it sahibləri onun ev heyvanının daha çox tülküyə bənzədiyini deməyə başladıqda və onların heyvanları qorxu nümayiş etdirdikdə şübhələr güclənib. Zoopark mütəxəssisi ilə məsləhətləşmədən sonra şübhələr tamamilə aradan qalxıb.

Ekspert təsdiqləyib ki, heyvan həqiqətən də ev tülküsüdür. Onun sözlərinə görə, yaş keçdikcə bu cür heyvanlarda xarakterik qoxu güclənir, ölçüləri isə böyüməyə davam edir.

Bundan sonra çinli qadın heyvanı müvafiq saxlama şəraiti və qidalanma ilə təmin olunacağı zooparka vermək qərarına gəlib. Tülkü qəfəsə yerləşdirilməzdən əvvəl məcburi karantindən keçəcək.

Hüseyn İbadlı