“Qəbələ”nin tarixinə düşən Şahsuvarlı

Azərbaycanı "Rio-2016" Yay Olimpiya Oyunlarında təmsil edən boksçu Kamran Şahsuvarlı "Qəbələ" İdman Klubunun tarixinə düşüb. Sportnet.az-ın məlumatına görə, Şahsuvarlı şərəfini qoruduğu bu kluba Olimpiya mükafatı qazandıran ilk idmançı olub. O, az öncə başa çatan 1/4 final döyüşündə qazandığı qələbə ilə bunu həyata keçirib.

Şahsuvarlının yarımfinala çıxması avtomatik ən azı bürünc medalçı olması deməkdir. Təbii ki, Kamran finala çıxarsa, Olimpiya çempionluğunun bir addımlığında olacaq.

Məlum olduğu kimi, "Qəbələ" Futbol Klubu 2013-cü ilin əvvəlində İdman Klubuna çevrilib. Bu isə deməkdir ki, "qırmızı-qaralar"ın ilk Olimpiadası məhz "Rio-2016"dır. "Qəbələ" Braziliyada keçirilən bu məsul yarışda 3 idmançı ilə təmsil olunur. Onlardan ən ağır çəkidə mübarizə aparan cüdoçu Uşanqi Kokauri çıxışını artıq başa vurub. "Qəbələ"nin digər boksçusu Lorenso Sotomayor da 1/4 finala çıxıb və sabah qalib gələrsə, o da ən azı bürünc medalı özünə təmin edəcək.

"Qəbələ" idmançılarının böyük yarışlarda ən böyük uğuru ötən ilin iyununda Bakıda keçirilən I Avropa Oyunlarında olub. Onda 5 medal (2 qızıl, 2 gümüş və 1 bürünc) qazanan "qırmızı-qaralar"ın həmin mükafatçılarından yalnız çempion Sotomayor "Rio-2016"da çıxış edir. Karate və sambo hazırkı Yay Olimpiya Oyunlarının proqramına daxil olmadığından, bu növdə Avropa Oyunlarının mükafatçıları olan "Qəbələ"li idmançılar kənarda qalıblar.

Qeyd edək ki, 75 kq çəkidə çıxış edən Şahsuvarlı Olimpidaya lisenziyanı bu il Bakıda keçirilən boks üzrə Dünya Olimpiya Təsnifat Turnirində qazanıb. (sportnet.az)