“Ermənistan məhsulları Azərbaycan bazarına axa bilər” - XƏBƏRDARLIQ

Sabiq millət vəkili Nazim Məmmədov Azərbaycanın MDB nəzdindəki Azad Ticarət Zonasına qoşulmamasını düzgün addım hesab edir. Sabiq millət vəkili Publika.Az-a açıqlamasında belə deyib: “Azərbaycanın imtinası göstərir ki, ölkə Avroatlantik məkana inteqrasiya baxımından götürdüyü öhdəlikləri yerinə yetirməkdə israrlıdır. Azərbaycan MDB-yə üzv ölkələrlə iqtisadi münasibətlərini ikitərəfli müqavilələrlə də davam etdirə bilər”.

Mayın 15-də Moskvada MDB dövlət başçılarının qeyri-rəsmi sammiti keçiriləcək. Sammitdə MDB dövlətlərinin Azad Ticarət Zonasına qoşulması barədə müzakirələr aparılacaq.

Azad Ticarət Zonası ilə bağlı müqavilə keçən ilin oktyabr ayında MDB-nin hökumət başçıları Şurasının Sankt-Peterburqdakı iclasında imzalanıb. Azərbaycanla yanaşı Özbəkistan və Türkmənistan da bu müqaviləni imzalamayıb.

Rusiyanın baş naziri Vladimir Putinin sözlərinə görə, bu üç ölkə müqaviləyə ilin sonunadək qoşulmağın mümkünlüyü məsələsini araşdırmağa üstünlük veriblər.

Nazim Məmmədovun sözlərinə görə, müqavilənin imzalanması Ermənistan məhsullarının Azərbaycan ərazisinə daxil olmasına şərait yaratmaqla, bəzi qardaş ölkələrin daha keyfiyyətli məhsullarının ölkə bazarından sıxışdırılıb çıxarılmasına zəmin yaradar. O, hesab edir ki, ümumiyyətlə Azərbaycan Rusiyanın istənilən layihəsindən uzaq olmalıdır:

“Hazırda Rusiyadan gələn məhsullarla bağlı əlavə rüsum və vergilər qoyulmur. Bu baxımdan öz bazarımızı Rusiyanın köhnə texnologiyalarına açıq saxlamaqda davam edirik. Əslində, belə bir siyasət Türkiyəyə yönəlik aparılmalıdır”.

Bəkir Nərimanoğlu

Publika.Az