Qurban Qurbanovun deyə bilmədiyi həqiqət

“Bura "Qarabağ"dır, uşaq bağçası deyil. Bizə gələn təkliflər ciddi olmalıdır. Sanki futbolçuların fikrini yayındırırlar. Futbolda küçə danışığı olmamalıdır. Menecerləri, klub rəsmilərini nəzərdə tuturam. Futbolçuların da "başı" gedir. Onlara yaxşı təklif edirlər, kluba isə az məbləğ təklif olunur. Pul bunların gözünü örtüb. Belə yanaşmaq olmaz. O qədər lazımsız, keyfiyyətsiz zənglər gəlir, düşünürsən ki, doğrudanmı bu zənglər klublardan gəlir? Mənim üçün heyəti saxlamaq böyük problemə çevrilib. Demək olar ki, futbolçuların 90 faizinə təkliflər var. Biri Yaponiyadan, biri Dubaydan zəng edir”.

Qurban Qurbanovun etirafıdır. Heyəti qorumaq üçün üzləşdiyi çətinlikdən danışıb. Ancaq bu, əsas səbəb deyil. Qurban Qurbanov əsl səbəbi deməyib. Deyə də bilməzdi. Buna peşəkar münasibətlər yol vermir. Qurban Qurbanovun deyə bilmədiyi həqiqəti biz deyəcəyik.

“Qarabağ”da heyəti saxlaya bilməməsinin əsas səbəbi daxildədir. “Neftçi”nin futbolçularının maaş büdcəsi “Qarabağ”dan 5 milyon manat çoxdur. Təsəvvür edirsiniz bu nə deməkdir? “Xetafe”də futbolçular “Real”ın ulduzlarından çox alırlar. “Maynts”ın maaş büdcəsi “Bayern”dən çoxdur. “Eyupspor”un futbolçularının məvacibinə “Qalatasaray”ın oyunçuları həsəd aparır.

Məntiq yoxdur, normal beyin bu anormallığı qəbul etməz axı. Yox, İspaniyada, Almaniyada, Türkiyədə bu anormallıq yoxdur. Məntiqin sındığı ölkə Azərbaycandır. “Neftçi”də futbolçuların maaş büdcəsi “Qarabağ”dan çoxdur. Bu statistik göstərici rəsmən açıqlanmamış da, Zubir, Kadi, Bikalyo, Medina, Yankoviç bilirdilər, bilirdilər ki, “Neftçi”dəki axsaq futbolçulardan xeyli az məvacib alırlar. Çempionlar Liqasında oynayan, hər il çempion olan futbolçuların beyni bu məntiqsizliyi necə qəbul etsin? Etməz axı. Təbii ki, onların fikri başqa yerdə olacaq, onlar “Neftçi”dəki maaş haqda düşünəcəklər.

Budur Qurban Qurbanovun deyə bilmədiyi həqiqət. Amma Zubir, Kadi, Medina, Bikalyo, Yanokoviç bir şeyi bilmirlər. Bilmirlər ki, “Neftçi”də oynamırlar, yuyurlar.

Natiq Muxtarlı