Kəsilməmiş qarpız fəlsəfəsi

Bizim cəmiyyətdə hər kəs bir sahənin mütəxəssisidir və heç kim heç vaxt uduzmur. Keçən gün böyük ümidlərlə, "başına vura-vura", səsini yoxlaya-yoxlaya bir qarpız seçdim. Satıcı da elə təriflər yağdırırdı ki, elə bil qarpız yox, gələcəyimi satın alıram. Evə gəlib həvəslə onu kəsdim, amma içindən çıxan mənzərə mənə tam bir xəyal qırıqlığı yaşatdı.

Qarpızın içi o qədər ağappaq idi ki, sanki qırmızı rəng piqmenti ümumiyyətlə icad olunmayıb.

Yaranan bu vizual şoku satıcı ilə bölüşmək qərarına gəldim və şəkli çəkib votsapla ona atdım. Çox keçmədi ki, telefonum zəng çaldı və dəstəyin o başındakı səs heç bir peşmançılıq hissi keçirmədən danışmağa başladı. Yəni satıcı. Tam bir azərbaycanlı "marketoloq" soyuqqanlılığı ilə mənə deyir: "Müəllim, narahat olmaginən e, diabetik qarpızdır". Həmin an donub qaldım və anladım ki, bizim millətin bəhanə tapmaq yaradıcılığı qarşısında heç bir böhran tab gətirə bilməz. Ağ qarpızı belə saniyələr içində "sağlamlıq məhsulu" kimi sənə sırımağı bacaran bir zəka ilə eyni coğrafiyanı paylaşırıq.

Əslində bu "diabetik qarpız" cavabı sadəcə bir ticarət fırıldağı deyil, həm də dərin bir mentalitet kodudur. Biz hər bir uğursuzluğumuza, hər bir səhvimizə dərhal xüsusi bir ad qoyub onu müqəddəsləşdirməyi çox sevirik. İllərdir cəmiyyətdə bir sıra mürəkkəb mental məsələlərin yanına boşuna "Kəsilməmiş qarpız" epiteti qoşmurlar. Çünki bizdə evlilikdən tutmuş karyeraya, təhsildən tutmuş dostluğa qədər hər şey o kəsilməmiş qarpızın taleyinə bağlıdır. Üstündən gözəl səslər gəlir, xarici görünüşü mükəmməl görünür, amma içi həmişə bir tapmacadır. Və ən pisi odur ki, o tapmacanın içi ağ çıxanda da günahı heç vaxt özümüzdə axtarmırıq.

Həyat bizə ağappaq bir qarpız təqdim edəndə, biz dərhal özümüzə təsəlli verib "onsuz da çox şirin şey ziyandır" deyirik. Bəlkə də elə buna görə ölkədə problemləri həll etmək əvəzinə, hər problemə bir bədii təyin tapıb onunla yaşamağı öyrənirik.

Nə deyək, gələn qarpızlarımız qırmızı, gələcəyimiz isə bu qarpızın içindən daha rəngli olsun.

Müəllif: Adəm Abbaslı