“Əli və Nino”nun ispan ulduzu Bakıda: "Aşiq oldum..." - FOTOLAR

“Əli və Nino” filminin aktyor və yaradıcı heyəti media nümayəndələri ilə görüşüb.

Axşam.az-ın məlumatına görə, hazırda davam edən tədbirdə filmin "Nino"su, ispan aktrisa Mariya Valverde də iştirak edir.

O, Azərbaycan və film haqda təəssüratlarını bölüşüb:

"İlk dəfədir ki, Qafqaz xanımı obrazında idim. Bir gürcü qızını canlandırmaq şərəf idi. Real həyatda Azərbaycan kişisi sevməmişəm, amma Azərbaycanın özünə aşiq oldum. Geyimlərin üzərindəki naxışları xüsusilə bəyəndim. Yenidən təklif gəlsə, burada filmə çəkilərəm. Bakı evim kimidir".

Prodüser Kris Tikyer:

"Kostyumlar xüsusi seçilib, çox bahalıdırlar. Burada o dövrdə hətta Avropada az olan motorlu maşınlardan istifadə etdik. Filmin Los-Anceles təqdimatı noyabrın 15-də baş tutacaq. Sonra isə Portuqaliya, ABŞ və Türkiyədə premyera olacaq. Əli obrazını canlandıran Adam Bakri Bakıya gələ bilmədi. Sənədlərlə bağlı problem oldu".

Aktyor Numan Akar:

"Çəkiliş meydançası maraqlı hadisələrlə dolu idi. Qubanın təbiətinə heyran olduq. Bir gün səhər durduq ki, qar yağıb. Gözəl mənzərə idi".

Aktrisa Mehriban Zəki:

"Rejissor Asif Kapadiaya təşəkkür edirəm ki, məni də bu filmdə çəkdi. Əvvəlcə mənim yerimə Türkiyədən aktrisa dəvət etmək istədilər, amma Asif mənim üzərimdə təkid etdi".

Qeyd edək ki, Qurban Səidin eyniadlı romanı əsasında çəkilən filmin icraçı prodüseri Leyla Əliyeva, prodüseri Kris Tikyer, rejissoru “BAFTA” mükafatı sahibi Asif Kapadia, ssenari müəllifi isə “Academy Award” mükafatı laureatı Kristofer Hemptondur.

Çəkilişlər Bakının müxtəlif məkanlarında, o cümlədən tarixi İçərişəhərdə, Qobustan, Xınalıq, Gəncə və Gədəbəydə aparılıb.

104 dəqiqəlik ekran əsərində baş rollarda Adam Bakri (Əli) və Mariya Valverde (Nino) çəkilib. Filmdə, həmçinin Halit Ergenç, Mendi Petinkin, Fəxrəddin Manafov, Konni Nilson, Rikkardo Samariko, Humayon Erşardi, Əsad Buab, Numan Akar və digər məşhur aktyorlar iştirak ediblər.