Yollarda yeni kameralar quraşdırılır: Pozuntular avtomatik internetdə dərc ediləcək

Rusiyada yol kameralarının quraşdırılması ilə bağlı yeni qaydalar qüvvəyə minir.

Publika.az "Ria Novosti"yə istinadən xəbər verir ki, bu barədə Dövlət Dumasının Nəqliyyat və Nəqliyyat İnfrastrukturunun İnkişafı Komitəsinin sədr müavini Pavel Fedyaev danışıb.

Sentyabrın 1-dən ölkədə ilk dəfə olaraq yol hərəkəti qaydalarının pozulmasının foto-videoçəkiliş sistemlərinin quraşdırılması üçün vahid tələblər tətbiq ediləcək. Prezidentin imzaladığı 197 saylı qanun kameraların quraşdırılması ilə bağlı qərarları yol polisinin razılığı ilə yerli hakimiyyət orqanlarına və yol sahibinə vermək hüququ verir.

Qanunda yol kameralarının quraşdırıla biləcəyi yerlərin xüsusiyyətləri də göstərilir. Bunlar marşrut nəqliyyat vasitələri üçün xüsusi zolaqlı yollar, qəzaya məruz qalan ərazilər və il ərzində dörd və ya daha çox qəzanın baş verdiyi yol kəsişmələridir.

Həmçinin yol işləri aparılan ərazilərdə, piyada keçidlərində, parkinq qadağan olunan yerlərdə, yol ayrıclarında və yol polisi tərəfindən müəyyən edilən yerlərdə kameraların quraşdırılmasına icazə verilir.

Kameralar haqqında məlumat və onların qeydə aldığı pozuntuların siyahısı internetdə dərc edilməlidir. Yeni tələblərə cavab verməyən kameralar sürücüləri cərimələyə bilməyəcək.

Yeni qaydalar qüvvəyə minən zaman uyğun olmayan bir çox yol kameraları söndürüləcək.

Adəm Abbaslı