Dəniz qana boyandı: Uşaqların gözü qarşısında dəhşətli qırğın

Farer adalarının sahilləri növbəti dəfə qara delfinlərin (qrind) və digər balinakimilərin ənənəvi kütləvi qırğını səbəbindən al-qırmızı rəngə boyanıb. Şimali Atlantik okeanının sahil sularını qan dənizinə çevirən bu dəhşətli mənzərəni sahildən çoxlu sayda yerli sakin, o cümlədən azyaşlı uşaqlar izləyib.

Publika.az xəbər verir ki, bu amansız ov “Qrindadrap” (və ya sadəcə “Qrind”) adlanır və kökləri min ildən artıq əvvəl yaşamış vikinqlər dövrünə gedib çıxır.

Minillik ənənə dəyişmir

Əsrlərdir davam edən ov prosesi demək olar ki, dəyişməyib. Balıqçılar açıq dənizdə qrind və ya delfin sürüsünü aşkar etdikdən sonra onları mühasirəyə alır və sahilə doğru qovurlar.

Ölüm qorxusu yaşayan heyvanlar dayaz sulara sıxışdırılır və sahilə çıxmağa məcbur edilir. Bundan sonra balıqçılar müdafiəsiz məməliləri bıçaqlarla öldürürlər.

Kəsim başa çatdıqdan sonra heyvanların cəsədləri sahil boyunca düzülür, qanları isə okean sularına axır. Bu zaman balıqçılar sinəyədək qana boyanmış suların içində dayanırlar. Daha sonra öldürülən heyvanların əti və piy qatı icma üzvləri arasında pulsuz paylanır və qida kimi istifadə edilir.

Tənqidlərə baxmayaraq davam edir

Farer adalarından yayılan bu ürəkdağlayan görüntülər hər il bütün dünyada ciddi etirazlara səbəb olur.

Heyvan hüquqlarını müdafiə edən beynəlxalq təşkilatlar bu ənənəni vəhşi, qəddar və orta əsrləri xatırladan ritual kimi qiymətləndirirlər. Onlar bildirirlər ki, qrindlər və delfinlər okean ekosisteminin qorunmasında mühüm rol oynayırlar.

Danimarkanın tərkibində muxtar ərazi olan Farer adalarının hakimiyyəti isə geri addım atmır. Rəsmilər “Qrindadrap”ın milli kimliyin və mədəni irsin ayrılmaz hissəsi olduğunu, eyni zamanda yerli əhalini pulsuz ərzaqla təmin etdiyini bildirirlər. Hətta valideynlər azyaşlı uşaqları da bu ovlara aparır, onlar yalnız qırğını izləmir, həm də qan içində olan heyvan cəsədlərinə toxunurlar.

Farer adalarında bu məməlilərin ovlanmasına dair rəsmi kvotalar mövcud deyil. Ekspertlərin qiymətləndirməsinə görə, hər il “Qrindadrap” zamanı mindən çox dəniz heyvanı öldürülür. Təkcə ötən il balıqçılar 814 adi qrind və Atlantik ağyanlı delfin məhv ediblər.

Mütəxəssislər bildirirlər ki, vəziyyəti daha da ağırlaşdıran amil balinakimilərin çox yavaş çoxalmasıdır. Təbiətdə dişi qrindlər 60 ilədək, erkəklər isə 45 ilədək yaşayır. Dişi fərd hər 3-6 ildən bir cəmi bir bala dünyaya gətirir və balaların böyüdülməsində bütün sürü iştirak edir.

“Qrindadrap” zamanı isə balıqçıların bıçaqları altına bütöv ailə qrupları, o cümlədən hamilə dişilər və balalar da düşür.

Adəm