Ukrayna müharibəsinə belə son qoyulmalıdır - Poroşenkonun təklifi

Ukraynanın keçmiş prezidenti Pyotr Poroşenko ölkənin NATO-ya inteqrasiyası üçün soyuq müharibənin dərslərini tətbiq etməyi təklif edib.

Publika.az xəbər verir ki, Poroşenko mövcud vəziyyətlə Sovet İttifaqının etirazlarına baxmayaraq, Qərbi Almaniyanın ittifaqa qoşulması vəziyyəti arasında paralellər aparıb.

"Times of Malta"nın məlumatına görə, Poroşenko "Biz bu təcrübədən öyrənməli və indi təkrarlamalıyıq" deyib.

O hesab edir ki, ABŞ-ın yeni seçilmiş prezidenti Donald Tramp Ukraynanı NATO-ya dəvət etməlidir ki, bu da Ukrayna münaqişəsini dayandırmağa kömək edəcək və Rusiya üçün siqnal olacaq.

“Financial Times”ın məlumatına görə, bu yanaşma hazırda Qərb rəsmiləri tərəfindən müzakirə olunur. Skeptiklər isə qeyd edirlər ki, Qərbi Almaniyada sərhədlər aydın şəkildə çəkilib, indiki Ukrayna münaqişəsində belə deyil.

Bundan əvvəl “Bloomberg” xəbər vermişdi ki, ABŞ-ın hazırkı prezidenti Co Bayden Ukraynanı NATO-ya dəvət etmək qərarına gəlib, lakin sonradan fikrini dəyişib, çünki bu, qısa müddətdə uğurlu olmayacaq.

Tural