Rusiya bu azərbaycanlını İnterpola verdi: “Dərhal həbs olunsun”

Rusiya Federasiyası Daxili İşlər Nazirliyi Baş İnformasiya-Analitik Mərkəzi və Federal Təhlükəsizlik Xidməti ( FSB) Ukrayna Qarapapaq Türkləri Milli Şurasının (UQTMŞ) sədri, Gürcüstan, Mərakeş Krallığı və Malta vətəndaşlığı olan, Ukrayna Boqun polkunun polkovnik-leytenantı Daşqın Gülməmmədov haqqında MDB məkanı üzrə qırmızı bülletenlə dövlətlərarası axtarış elan edib.

Publika.az xəbər verir ki, bu barədə İnterpolun Ukrayna Milli Mərkəzi Bürosunun rəisi, general-mayor Vasili Nevolya məlumat verib.

D. Gülməmmədov milli ayrı-seçkilik salmaqda və irqçilikdə günahlandırılır. Bu gün Moskva vaxtı ilə saat 09.00-dan etibarən Rusiya DİN-nin D. Gülməmmədov haqqında elan etdiyi dövlətlərarası axtarış barədə informasiya, Moskva Basmannıy Rayonu Dairə Məhkəməsinin qətnaməsi və RF Federal Təhlükəsizlik Xidməti Kollegiyasının qərarı Rusiya, Qazaxıstan, Ermənistan, Belorus, Özbəkistan, Türkmənistan, Qırğızıstan, Tacikistan, Gürcüstan, həmçinin MDB-dən kənar İsveçrə Konfederasiyası, Birləşmiş Ərəb Əmirlikləri, İordaniya, Misir, Rumıniya, Macarıstan, İspaniya, İran, Fransa, Kanada, Çin, Şimali Koreya, Suriya, Mərakeş və Maltanın DİN, xüsusi xidmət qurumlarının və Sərhəd Xidmətlərinin məlumat bazasına yerləşdirilib. Rusiya DİN Daşqın Gülməmmədovun dərhal həbs edilməsi şərtini qoyub.

Qafqaz Qarapapaq Türkləri Konfederasiyasının (QQTK) rəhbəri Elmar Həsənov Publika.az-a açıqlamasında məlumatı təsdiq edib.

Onun sözlərinə görə, informasiya dəqiqdir və hazırda qabaqlayıcı tədbirlərin, o cümlədən beynəlxalq təşkilatların məsələyə reaksiya verməsi ilə məşğuldurlar: “Daşqın Gülməmmədovun Rusiya DİN tərəfindən dövlətlərarası axtarışa verilməsi onun Ukraynadakı fəaliyyəti, Ukraynanın ərazi bütövlüyü uğrunda fəal çıxışları və Krım tatarlarının hüquqlarının müdafiə etməsi ilə bağlıdır”.

E. Həsənov bildirib ki, bunun olacağını öncədən gözləyirmişlər: “Məsələnin diplomatik yolla və şəxsi kanallar vasitəsi ilə aradan qaldırılması istiqamətində iş aparırıq”.

Asif Nərimanlı