Üçüncü dünya müharibəsi başlayırmı? – amerikalı professordan PROQNOZ

“Rusiya ilə Türkiyə arasında yaranmış vəziyyət üçüncü dünya müharibəsinin əlaməti deyil”.

Publika.az xəbər verir ki, bu barədə Nyu-York Universitetinin professoru, Rusiya məsələləri üzrə mütəxəssis Mark Qaleotti “Forbes” nəşrinə açıqlamasında deyib.

Onun sözlərinə görə, hətta ruslarla türklər müharibəyə başlamaq istəsələr belə, onlarda bunun üçün lazım olan resurs yoxdur: “Rusiya ordusu Suriyaya canlı qüvvə və hərbi texnika göndərməklə onsuz da ciddi itkilərə məruz qaldı. Onlar indiki vəziyyətdə Türkiyə kimi ciddi rəqiblə mübarizə aparmaq iqtidarında deyil. Bu baxımdan, Putindən qəzəbli çıxışlar gözləmək olar, amma güman etmirəm ki, Rusiya qırıcıları Ankaraya hücum edəcək”.

Professor hesab edir ki, bu hadisə hər iki tərəfdən unudulmağa çalışılacaq: “Bu həqiqətdir ki, Türkiyə və Rusiya marionet müharibənin iştirakçısına çevrilib. Amma düşünmək lazım deyil ki, baş verənlər Rusiya və NATO arasında genişmiqyaslı müharibəyə səbəb olsun. Ruslar da, türklər də Suriyaya müdaxilə ilə geosiyasi təsirə və beynəlxalq nüfuza nail olmağa çalışırlar. İndiki halda yalnız onu təsəvvür etmək olar ki, Rusiya kürdlərə dəstək verəcək, Türkiyə də cavab olaraq Şimali Qafqaz döyüşçülərinə”.

Asif Nərimanlı