Ukrayna məsələsi: Azərbaycan BMT-də necə səs verəcək?

Azərbaycanın Ukraynadakı səfirliyi bəyanat yayıb. “Media forum” saytının məlumatına görə, martın 27-də yayılan bəyanatda deyilir: “Azərbaycan Respublikasının Ukraynanın ərazi bütövlüyünü, suverenliyini və sərhədlərinin toxunulmazlığını dəstəkləyən mövqeyi dəyişməz olaraq qalır. A

zərbaycan tərəfi ekstremizm, radikalizm və separatizmin istənilən formalarını pisləyir və beynəlxalq sülh və təhlükəsizliyin, o cümlədən BMT-yə üzv dövlətlər arasındakı münasibətlərin özəyini təşkil edən suverenlik, ərazi bütövlüyü və dövlətlərin beynəlxalq səviyyədə tanınmış sərhədlərinin toxunulmazlığı prinsiplərinə dönməz bağlılığını bir daha təsdiqləyir. Azərbaycan BMT üzv-dövlətləri arasında mövcud bütün münaqişələrin yuxarıda qeyd olunan prinsiplər əsasında siyasi dialoq vasitəsilə həllinin tərəfdarıdır.

BMT Baş Assambleyasının 27 mart 2014-cü ildə Ukraynadakı vəziyyətlə bağlı keçirəcəyi iclasda Azərbaycan Respublikası Ukraynanın suverenliyi və beynəlxalq səviyyədə tanınmış sərhədlər çərçivəsində ərazi bütövlüyünün dəstəklənməsi barədə qətnamə layihəsinin müzakirəsində Ukraynanın mövqeyini dəstəkləyəcək”.