Deputat: “Azərbaycan Ermənistandan cavab gözləyir”

“Azərbaycan Birinci Qarabağ müharibəsində itkin düşmüş vətəndaşlarımızın aqibəti haqqında Ermənistandan cavab gözləyir. Qarşı tərəf uzun müddət idi ki, bu məsələyə aydınlıq gətirmirdi”.

Bunu Publika.az-a açıqlamasında millət vəkili Aydın Mirzəzadə deyib.

Deputat qeyd edib ki, hər iki ölkə problemli məsələlərin həll olunması üçün müəyyən addımlar atmalıdır: “Azərbaycan Ermənistana qarşı növbəti humanist addım atdı. Ötən il bizə qarşı əməliyyatlarda iştirak edib əsir düşmüş 8 diversant Fransa prezidentinin təşəbbüsü ilə öz ölkələrinə təhvil verildi. Bu onu göstərir ki, Azərbaycan qarşı tərəflə münasibətləri yaxşılaşdırmaqda maraqlıdır. Ancaq münasibətlərin normallaşması üçün qarşı tərəf də bu məsələyə ciddi yanaşmalıdır. Azərbaycan Birinci Qarabağ müharibəsində itkin düşmüş 4 minə yaxın insanın aqibəti haqqında Ermənistandan məlumat tələb edib.

Həmin itkin düşmüş şəxslər təkcə hər hansısa bir ailənin deyil, 10 milyondan çox Azərbaycan xalqının dəyərli oğul və qızlarıdır. Azərbaycanla Ermənistan arasında olan münasibət artıq ölü nöqtədən tərpənib. Fransa prezidentinin təşəbbüsü ilə keçirilən onlayn görüşdə Ermənistan tərəfi bu məsələlərlə bağlı öz razılığını bildirib. Onların bu cür problemlərə aydınlıq gətirəcəyinə ümid edirik. Aqibətlərindən xəbər verilməyən 4 minə yaxın insanın qohumları, əzizləri onlar haqqında məlumat almaq istəyirlər. İtkin düşmüş şəxslərin taleyi haqqında bizə məlumat verilməli və həlak olmuş şəxslərin yerləri Azərbaycana bildirilməlidir. Azərbaycan dövləti öz vətəndaşlarının taleyinə sahib çıxır və onlar haqqında Ermənistan tərəfindən məlumat istəyir”.