Gülağa Aslanlı: “Qubad bəyə səs verdiyi üçün peşman olanlar var”

“Qurultayda Qubad bəyə səs verənlər arasında peşman olanların sayı artmaqdadır”.

Bunu Publika.az-a açıqlamasında Müsavat Partiyasının Mərkəzi İcra Aparatının rəhbəri Gülağa Aslanlı ADR hərəkatının təsisçisi, başqanlığa keçmiş namizəd Qubad İbadoğlunun “Müsavatda növbədənkənar qurultayın keçirilməsinin zərurətini anlayanların sayı artır” sözlərinə münasibət bildirərkən deyib.

G. Aslanlı isə bunun əksini söyləyib. Onun fikrincə, vaxtilə Qubad İbadoğlunu dəstəkləyənlər arasında peşman olduğunu səmimi etiraf edənlər var: “Məndə olan məlumatlara görə, əvvəllər hansısa səbəbdən Qubad bəyə səs vermək istəyən insanlar səhv yolda olduğunu səmimi etiraf edirlər. Hazırda “yaxşı ki, Qubad bəy partiyanın başqanı seçilməyib” deyənlərin sayı daha çoxdur, nəinki növbədənkənar qurultayın olmasının istəyənlər”.

G. Aslanlı Qubad İbadoğlunu dediyi fikirlərlə bağlı faktlar ortaya qoymağa çağırıb.

“Dediklərini təsdiq edən faktlar ortaya qoysun. Halbuki, onun söylədikləri doğru deyil. Mənim iştirak etdiyim rayon təşkilatlarının konfranslarında Qubad bəyə səs verdiyi üçün səhv etdiklərini etiraf edənlər olub. Hətta yenidən qurultay olarsa, ona səs verməyəcyini deyənlər də var. Belə insanların sayı getdikcə artmaqdadır”, - deyə Müsavat rəsmisi qeyd edib.

Asif Nərimanlı