Nida Təhlil
Azərbaycanın hərbi və siyasi cəbhədə qalib gəldiyi döyüş – TƏHLİL
Azərbaycan tarixinə qələbə olaraq düşən aprel
döyüşlərindən bir il ötür. Azərbaycan Ordusu bu döyüşlərlə həm
hərbi, həm də siyasi cəbhədə mənzərəni dəyişdirdi.
“Dördgünlük müharibə”: aprelin 2-dən 5-nə qədər
davam edən toqquşmaların başlanmasına səbəb erməni hərbi
birləşmələrinin cəbhədə təxribata əl atması idi. Azərbaycan Ordusu
Ali Baş Komandan İlham Əliyevin əmri ilə düşmənə qarşı əks-hücuma
keçdi və təxribatın qarşısını almaqla yanaşı, işğal altındakı
ərazilərin bir hissəsini azad etdi. Həmin hadisələrin gedişatını və
nəticələrini analiz etdikdə Azərbaycanın dörd gün davam edən
müharibədə ciddi üstünlüklər qazandığı aydın görünür:
Strateji qələbə: 2 min hektar ərazi düşməndən
təmizləndi. “Lələtəpə” yüksəkliyi, Talış və ətrafdakı strateji
yüksəklikləri azad edilməklə ordumuz təmas xəttində mövqelərini
gücləndirdi.
“Lələtəpə” yüksəkliyinin strateji baxımdan iki əhəmiyyəti var: Araz
boyu istiqamətdə 10 kilometrlərlə məsafəni nəzarətdə saxlamaq;
Füzulinin Horadiz və Cəbrayıl rayonunun Cocuq Mərcanlı yaşayış
məntəqəsində mülki əhalinin təhlükəsizliyini təmin etmək.
Eyni mənzərə işğaldan azad olunan Talış və ətraf yüksəkliklərə də
aiddir. Bu strateji mövqelərin düşməndən təmizlənməsi nəticəsində
cəbhəboyu yaşayış məntəqələrində, həmçinin, Goranboy və Naftalan
rayonlarında mülki əhalinin təhlükəsiz yaşayışı təmin olundu.
Strateji nəticələr
1. Strateji qələbənin gətirdiyi nəticələr ortadadır. Prezident
İlham Əliyevin müvafiq sərəncamı ilə işğaldan azad olunmuş Cocuq
Mərcanlı kəndinə qayıdış başlandı. Hazırda ərazilərin minadan
təmizlənməsi prosesi həyata keçirilir, bundan sonra, orada geri
qayıdan qaçqınlar üçün yaşayış mənzilləri inşa olunacaq. Bu
istiqamətdə işlər sürətlə aparılır.
2. Talış yüksəkliyi düşməndən təmizlənəndən sonra Ermənistan
hakimiyyətinin bu istiqamətdə yerləşdirdiyi ermənilər oranı tərk
etdi. Rusiyalı jurnalist İlya Barabanovun aprel döyüşlərindən sonra
Talış kəndindən hazırladığı reportajda ermənilərin kəndi tərk
etdiyi, sonuncu 50 nəfərin də tezliklə köçəcəyi deyilir. Bu ilin 25
fevral tarixində isə ermənilərin Talış kəndi üzrə icra nümayəndəsi
Vilen Petrosyan etiraf etdi ki, kənddə cəmi 10-15 kişi qalır.
Onların ailələri isə Talışda yaşamır.
Aprel döyüşləri və Prezident İlham Əliyevin qaçqaınların azad
olunmuş ərazilərə qayıtması ilə bağlı verdiyi qərarlar QARABAĞA
QAYIDIŞIN başlanğıcı hesab oluna bilər.
***
Siyasi qələbə: Münaqişənin nizama salınması
prosesi ilə məşğul olan ATƏT-in Minsk qrupunun regiona “turist
səfərləri” nəticəsində Qarabağda düşmənin xeyrinə olan status-kvo
davam etməkdə idi. Həmsədrlərin bu fəaliyyəti dünya ictimaiyyətində
münaqişənin “dondurulmuş” olduğuna dair yanlış fikirlər yaratmış və
beynəlxalq güclər bu problemi rəfə qaldırmışdılar. Aprel döyüşləri
ilə mənzərə dəyişdi. Azərbaycan ordusu problemi “tozlanmış rəf”dən
götürdü və BMT Təhlükəsizlik Şurasının Qarabağa dair qətnamələrini
onu qəbul edənlərin önünə çıxartdı.
Azərbaycan sübut etdi ki: İşğal olunmuş torpaqlardan vaz
keçməyib; münaqişə “dondurulmuş” deyil; hər an ildırımsürətli
hücumla ərazi bütövlüyümüzü bərpa edə bilər; o, müharibə istəmir,
amma işğalın davam etməsinə icazə verə bilməz və işğala son qoymaq
üçün atılacaq hər addıma görə məsuliyyəti işğalçı ölkə və onun
arxasındakı güclər daşıyır.
Siyasi nəticələr
Və nəticə etibarilə, beynəlxalq diplomatiyanı hərəkətə keçirdi.
Okeanın o tayından sülhə çağırışlar səsləndi. Rusiya baş
diplomatını Bakıya göndərdi, Dmitri Medvedyev İrəvan-Bakı
istiqamətində uçuşlara başladı. Döyüşlər o şərtlə dayandırıldı ki,
münaqişənin həlli üçün danışıqlar prosesi ölü nöqtədən
tərpənməlidir. 2016-cı ilin 16 may tarixində Vyana görüşü
keçirildi. 20 iyunda Sankt-Peterburqda ikinci görüş baş tutdu.
Razılığa gəlindi ki, münaqişə “mərhələli həll” variantı ilə həll
olunsun. Sonrakı dövrdə Ermənistanın daxilindəki proseslər,
beynəlxalq proseslər və Rusiyanın istəyi nəticəsində bu razılıq
təxirə salındı.
Lakin aprel döyüşləri ilə Azərbaycan sübut etdi ki, bundan
sonra münaqişəyə dair heç nə əvvəlki kimi olmayacaq; Ermənistan öz
həyasız ərköyünlüyünü davam edə bilməyəcək, vəziyyət “dondurulmuş”
qalmayacaq, ərazi bütövlüyümüzün bərpası üçün real addımlar
atılacaq, düşmən işğal siyasətini yürüdə bilməyəcək; Bunların əksi
demək, Azərbaycan əsgərinin gücü ilə qarşılaşmaq
deməkdir.
***
Ermənistan aprel döyüşlərində həm hərbi cəbhədə, həm ideoloji
cəbhədə, həm də siyasi cəbhədə məğlubiyyətə uğradı. Ordumuz
düşmənin cəzasızlıq mühitindən istifadə edərək, illərdir yaratdığı
hərbi, ideoloji, siyasi mifi alt-üst etdi.
Ermənistan Qərbdə arxasını “erməni lobbisi”, Şərqdə Kollektiv
Təhlükəsizlik Müqaviləsi Təşkilatına (KTMT) söykəyərək, Azərbaycan
torpaqlarında işğal siyasətini davam etdirir və düşünürdü:
- Azərbaycan Qarabağı azad etmək iqtidarında deyil.
- Azərbaycan Ordusu 90-cı illərin köhnə tanklara malik nizamsız
ordudur.
- Azərbaycan I Qarabağ savaşının məğlub tərəfidir və heç vaxt bu
sindromdan xilas ola bilməyəcək.
Azərbaycan əsgəri cəmi dörd gün ərzində düşmənin qalibiyyət
xülyasını alt-üst etdi və regionda yeni reallığın əsasını
qoydu.
a) Ordumuz rəsmi Bakının illərdir ilmə-ilmə toxuduğu diplomatik
zəfərin nöqtəsini qoydu. Ermənistan nə dünyanın heç bir ölkəsindən,
nə də indiyə qədər arxalandığı KTMT və “erməni lobbisi”ndən dəstək
ala bilmədi.
KTMT-nin əsas üzvləri – Qazaxıstan və Belarus qəti şəkildə
Azərbaycan əsgərinin ərazi bütövlüyü uğrunda döyüşünü
dəstəklədi.
Rəsmi Minsk bir qədər də irəli gedərək, aprelin 4-də - döyüşlərin
getdiyi bir vaxtda hərbi doktrinasına dəyişiklik etdi və ordusunun
ölkədən kənar hərbi əməliyyatlarda iştirakını məhdudlaşdırdı. Bu,
Lukaşenkonun “Azərbaycanla döyüşmək ehtimalı”na
qarşı gedişi idi.
Rəsmi Astana isə açıq şəkildə Ermənistanı işğal etdiyi torpaqlardan
geri çəkilməyə dəvət etdi. Hətta Nazarbayev apreli 8-də - atəşin
dayandırılmasından 3 gün sonra Avrasiya İqtisadi İttifaqının
İrəvanda keçirilməsi nəzərdə tutulan sammitinin yerini dəyişmək
üçün hərəkətə keçdi və sammit aprelin 13-da Moskvada baş tutdu. Bu,
Nazarbayevin “dördgünlük müharibə”dən sonra “İrəvana getmək
Ermənistana dəstək kimi görünə bilər” ehtimalına qarşı
addımı idi.
... Bu, Prezident İlham Əliyevin başlatdığı siyasi
reformasiyanın Ali Baş Komandan İlham Əliyevin yumruğu ilə
tamamlanması demək idi...
Ermənistanın okeanın o tayında “erməni lobbisi”ndən gözlədiyi
dəstəyin kökünü Prezident İlham Əliyevm aprelin 1-də Vaşinqton
səfəri ilə qazımışdı. Beləcə, düşmən öz kinində boğulub qaldı.
Ermənilər Qarabağın Azərbaycana qaytarılmasını tələb
edir
Aprel döyüşlərində məğlubiyyət Ermənistnın daxilində ciddi
çaxnaşmalara səbəb oldu. “Dördgünlük müharibə”dən bir il keçməsinə
baxmayaraq, düşmən ölkə məğlubiyyət sindromundan çıxa bilmir,
həmçinin, sadə ermənilər İrəvan rejiminə “bizim olmayan əraziləri
sahibinə qaytar” tələbi irəli sürür.
Mənzərə belədir: “Bu bizim müharibə deyil”, yaxud “Serj,
başqasının torpağını qaytar” deyən insanlar Qarabağı istəmir;
İrəvan rejiminin Qarabağa göndərdiyi erməni hərbiçiləri arasında
fərarilik artıb; Azərbaycanın işğal olunmuş ərazilərində
yerləşdirdiyi ermənilər buranı tərk edir; bu münaqişə ilə
hakimiyyətini uzadan “Qarabağ klanı”nın içində ciddi çatlar
yaranıb.
“Erməni Milli Konqresi”nin lideri Levon Ter-Petrosyan isə bu
günlərdə açıqladı ki, “nə qədər gec deyil, daha az itki ilə
Qarabağı təcili qaytarmalıyıq”. Onun bu çağırışı
Ermənistan cəmiyyəti tərəfindən böyük dəstək qazandı.
***
Aprel döyüşləri sübut etdi ki, tezliklə işğal olunmuş torpaqlar
azad olunacaq və orada Azərbaycan bayrağı dalğalanacaq.
Ali Baş Komandan İlham Əliyev də martın 31-də aprel döyüşlərinin
iştirakçıları ilə görüşdə bunu açıq şəkildə bəyan etdi: “Biz işğal
edilmiş torpaqlara qayıdacağıq. Bu, bizim əsas vəzifəmizdir. Necə
ki, keçən il azad edilmiş torpaqlarda bu gün bayrağımız dalğalanır,
hələ də işğal altında olan bütün başqa torpaqlarımızda da
Azərbaycan bayrağı qaldırılacaqdır”.
Asif Nərimanlı
-
Nida Xəbər 11:55
İlham Əliyev Almaniyada mühüm tədbirdə çıxış etdi - Yeniləndi
-
Nida Xəbər 10:29
Qriqoryan İrana hesabat verdi: Delimitasiya ilə bağlı
-
Nida Təhlil 09:26
Füzulidən Berlinə uçuş: Əliyevin təyyarəsi niyə Qarabağdan qalxdı?
-
Sosial08:42
Azərbaycanda general vəfat etdi
-
Magazin208:00
Şakira açıq-saçıq geyimi ilə heyrətləndirdi - FOTO
-
Yaxın Şərq07:30
"Hizbullah" İsraili artilleriyadan atəşə tutdu
-
Dünya06:46
ÜST-dən siqaretlə bağlı HƏYƏCAN TƏBİLİ: "Gənclərin 57%-i..."
-
Sosial05:15
Anasından asılı olan qızların 5 ƏLAMƏTİ - Sonrakı həyat necə olacaq?