Dollarla bağlı YENİ PROQNOZ: "Neftin qiyməti 100 dollara çatarsa..."

2024-cü ilin əvvəli üçün baza proqnozuna əsasən, bəzi ixracatçı şirkətlər tərəfindən valyuta gəlirlərinin məcburi satışı ilə bağlı tələblərin davam etməsi fonunda dolların məzənnəsi 85 rubla qədər enə bilər.

Publika.az xəbər verir ki, bu barədə Lenta.ru-ya "Alfa Capital" menecment üzrə analitik Aleksandr Djioyev məlumat verib.

Ekspert Rusiya valyutasını dəstəkləyəcək digər amillər arasında şirkətlər tərəfindən debitor borclarının qaytarılması mexanizmlərinin yaradılmasını və idxal göstəricilərinin optimallaşdırılmasını qeyd edib.

Valyuta bazarında vəziyyətin təqdim olunan optimist ssenarisinə görə, gələn il dollar 70-75 rubl diapazonunda sabitləşə bilər. Belə bir inkişaf o zaman mümkün olacaq ki, dünya iqtisadiyyatının daha sürətli artım templəri hesabına neftin qiyməti bir barel üçün 100 dollara çatsın.

Eyni zamanda, BKF bankının analitik şöbəsinin rəhbəri Maksim Osadçinin proqnozuna görə, 2024-cü ildə dolların məzənnəsi böyük ehtimalla 100 rubldan yuxarı qalxacaq, lakin o, 200 rubl səviyyəsinə çatmağı çətin hesab edib.

PSB İdarəetmə Şirkətinin investisiyalar üzrə idarəedici direktoru Nikolay Ryaskov 2024-cü ilin birinci rübündə dolların məzənnəsinin böyük ehtimalla 90-100 rubl səviyyəsində olacağını gözləyir.

Hüseyn İbadlı