Azərbaycanlı qız dünya gözəllik atlasında – FOTO

Dünyaca məşhur rumıniyalı fotoqraf Mixayel Norok bir neçə gün əvvəl Azərbaycana gəlib. Müxtəlif ölkələrə səfərləri zamanı qarşısına çıxan təbii gözəl qızların fotolarını çəkən fotoqraf Bakıda Fidan adlı azərbaycanlı qızla tanış olub və fotosunu çəkib.

Publika.az xəbər verir ki, fotoqraf Fidanın şəklini rəsmi “The Atlas of Beauty” səhifəsində paylaşıb və təəssüratlarını qeyd edib:

“Bir neçə həftə əvvəl Azərbaycanın paytaxtı Bakıda səfərdə olarkən xeyli gözəl qadınla tanış olmaq və onlarla söhbət etmək imkanım oldu. Kişilərin dominantlıq etdiyi cəmiyyətdə qadınların əksəriyyəti hələ də ərlərinin icazəsini almadan şəkil çəkdirməkdən qorxur.

Azərbaycanda gender bərabərliyi uğrunda mübarizə aparan qadınlar var. Onlar hələlik azlıq təşkil etsə də, mən əminəm ki, belə qadınların sayı yaxında durmadan artacaq.

Fidan da qarşılıqlı ehtiram və bərabərlik olmadan heç bir münasibət qurmayacağını deyən heyrətamiz xanımlardan biridir.

Bu sözlər bəzilərinə bəlkə də güclü təsir bağışlamaya bilər. Amma mənə inanın ki, qadının belə sözləri dilə gətirməsi dünyanın çox məkanlarında böyük cəsarət və qətiyyət tələb edir”.