100 yaşlı qadın uzunömürlülüyün SİRRİNİ AÇDI

Amerikanın Ueynsboro (Şimali Karolina) şəhərinin sakini Meri Enn Batten 100 yaşını qeyd edib.

Publika.az xəbər verir ki, özünü 70 yaşında hiss etdiyini deyən qadın uzunömürlü olmağın sirlərini bölüşüb. Yubilyar bu yaşa çatmaq istəyənlərə öz məsləhətlərini verib.

Battenin fikrincə, uzun ömür sürməyin sirri sadədir: sadəcə olaraq gündəlik həyatın gözəlliklərindən həzz almağı bacarmaq və sağlam vərdişlərə sahib olmaq lazımdır. “The Washington Post” yazır ki, o, sağlam qidalanır, səhər tezdən durur, gün ərzində hərəkətdə olur.

Qızlarının dediyinə görə, o, səhər saat 6-da oyanır, səhərin çox hissəsini ya bağda, ya da ətrafı qaydaya salmaqla keçirir. Saat 10-da çöl işlərini bitirdikdən sonra Meri Enn vaxtını mütaliəyə həsr edir. 100 yaşlı qadın yalnız keçən ildən gündüzlər yatmaq vərdişi qazanıb. O, ailəsi ilə səyahət etməyi də çox sevir.

Cavanlığından söz açan Batten maraqlı və yaxşı həyat sürdüyünü deyir. O, gənclərə sevinc yollarını tapmağı, bütün problemlərə baxmayaraq, həyatı doya-doya yaşamağa çalışmağı tövsiyə edib:

"Nə olursa-olsun, hər dəqiqənizdən həzz alın".