Moda dünyasını silkələyən gözəl - Dizaynerlərin ilham pərisinin HEKAYƏSİ

20-ci əsrin əfsanəsi, özünəməxsus üslubu və xüsusi incəliyi ilə hər kəsi ruhlandıran Ceyn Birkin 16 iyul 2023-cü ildə 76 yaşında dünyasını dəyişdi. O, geridə nəhəng yaradıcılıq irsi qoyub - Ceyninin 80-dən çox filmi və 20 musiqi albomu var. Əlbəttə ki, onun tərcümeyi-halında fransız aktyoru və ifaçısı Serj Qensburq ilə həm peşəkar, həm də şəxsi mənada əməkdaşlıq xüsusi yer tutub. Ancaq o, heç vaxt dahi həyat yoldaşının kölgəsi olmayıb. Birkin bütün dünya üçün yeni üslub qanunları təyin edən müstəqil yaradıcı bir şəxsiyyət idi.

Publika.az oxucuları Ceyn Birkinin həm həyatı, həm də moda aləmində xidmətləri barədə maraqlı faktlarla tanış edir.

Ceyn Birkin britaniyalı olmasına baxmayaraq, həyatının çox hissəsini Parisdə keçirib. Ən maraqlısı odur ki, fransız tərzinin bütün dünyada məşhurlaşmasında da onun rolu misilsizdir. O, göstərdi ki, əlavə səy göstərmədən də gözəl geyinmək və seksual olmaq mümkündür. Ceyn öz təbii davranışı və unudulmaz görünüşü ilə istənilən, hətta ən sadə obrazı belə bəzəyirdi. Ceyn Birkin dünya modasına təsirinin fərqində idi və bu təsirin güclü olduğuna şübhə etmirdi.

Ceyn Birkin Londonda hərbçi və aktrisa ailəsində anadan olub. Qızın karyera seçimi təbii idi: həm anası, həm nənəsi, həm də babası teatrda işləyirdi. O, müsahibələrinin birində etiraf edib ki, ilk rol seçimlərinə 17 yaşında qatılıb və həyəcandan mətnin bütün sözlərini unudub. Buna baxmayaraq, gənc qız rola qəbul olunub. Birkin təəccüblə "Amma mən heç bir söz demədim!" qışqırsa da, məlum olur ki, ona kar-lal qız rolunu oynamaq təklif olunur. Beləliklə, gənc bir britaniyalının kino karyerası başladı.

17 yaşında Ceyn Birkin növbəti dinləmələrdə bəstəkar Con Barri ilə tanış olur. Bu, aktrisanın taleyində ciddi dönüş nöqtəsi idi. Yaş fərqinin böyük olmasına baxmayaraq, onlar evlənirlər. Əsl şöhrət gətirən filmdə baş rolu canlandırmaq üçün Ceynini bir çox cəhətdən ruhlandıran Con oldu. Rejissor Mikelancelo Antonioni o vaxtkı on səkkiz yaşlı Ceyni görüb "Blow Up" filmində rol almağı təklif edir. Bu rolda Ceyn tamamilə soyunmalı idi. Barrinin "Sənin buna cəsarətin çatmaz" kimi iynəli sözlərindən sonra Ceyn soyunmağa və ya kinoya çəkilməyə razı olur.

Amma üç illik münasibətdən sonra cütlük ayrılmağa qərar verir. Aktrisa çətin günlər keçirirdi. Odur ki, bu nikahdan dünyaya gələn qızı Keyt ilə birlikdə Londonu tərk edərək Fransaya köçür.

Böyük eşq

Ceyn fransızca zəif danışsa da, dinləmələrə dəvət olunurdu. Və kim bilirdi ki, növbəti film britaniyalı üçün taleyüklü olacaq. "Şüar" filminin çəkiliş meydançasında bəstəkar Serj Qesnburq məşhurlaşmağa yenicə başlayan Ceynin diqqətini çəkir. Əvvəlcə onlar münasibət qurmaqda çətinlik çəkirdi, lakin sevgi bütün sərhədləri silir...

Cütlüyün çıxışları mütəmadi olaraq ictimaiyyəti qıcıqlandırırdı. Ceyn açıq-saçıq libaslarda ictimaiyyət qarşısına çıxır, Serj isə ya sərt smokinqlərdə, ya da təsadüfi düymələri açıq olan köynəklərdə və cırıq cins şalvarda görünürdü. Başqalarının diqqətini cütlüyün sadəcə orijinal və bəzən eyni olan görüntüləri deyil, həm də hay-küylü münasibətləri çəkirdi. Sevgililər ictimaiyyətdən heç nəyi gizlətmirdi, nə ehtiraslarını, nə də qalmaqallı münaqişələrini...

Qensburqun Bricit Bardo üçün yazdığı əfsanəvi "Je t'aime ... moi non plus" ("Mən səni sevirəm ...") bəstəsi tandemə inanılmaz populyarlıq qazandırdı. Serjin keçmiş sevgilisi bu mahnının çox ədəbsiz olduğunu səbəb göstərərək onu ifa etməkdən imtina etdi. Ceyn isə mahnının melodiyalarını eşidəndə bir dəqiqə belə tərəddüd etmədi. O, bu erotik hiti oxumağa məmnuniyyətlə razılıq verdi. Vulqar tonlarına görə mahnı Vatikanda və bəzi başqa ölkələrdə qadağan edilmişdi, lakin belə bir “ləğv” ictimaiyyətin diqqətini daha da cəlb etmişdi.

Məsum cazibədarlıq

Ceyn heç vaxt vəhşi gözəl olmayıb. Dağınıq saçlar, düz saç düzümü, uşaq təbəssümü və oğlan fiqurası o dövrün gözəllik qanunlarına zidd idi. O zamanın əsas seks simvolu cazibədar sarışın - Merilin Monro idi. Lakin Ceyn heç vaxt özgüvənsiz olmayıb, bu inamı sayəsində o qadınsal olmayan bədən quruluşunu nümunəvi bir modelə çevirdi. O, göstərdi ki, seksual görünmək üçün korsetlər və dərin dekolteli paltarlar seçmək qətiyyən lazım deyil. Hətta cins şalvarda və aktrisanın çox sevdiyi adi bir köynəkdə belə, kifayət qədər cazibədar ola bilərsiniz.

Ceyn heç vaxt moda qanunlarına əməl etmirdi, sadəcə özünü dinləyir və ekspertimentlərə sakit yanaşırdı. O, mikro şortları və onları bir neçə ölçüdə çox böyük olan köynəklə birləşdirməyi çox sevirdi. Və ya uşaq geyimlərini xatırladan çox qısa paltarlar geyinirdi. Onları ulduzu düz, kvadrat dabanlı ayaqqabılarla, zamşa çəkmələrlə və ya ağ idman ayaqqabısı ilə uyğunlaşdırırdı. Aktrisa trikotaj həcmli sviterləri uzun ayaqlarını vurğulayan cins şalvarlarla birləşdirməyi də xoşlayırdı. Ceyninin büstqaltersiz geyindiyi üstü yazılı və ya yazısız sadə köynəklər və toplar da qarderobunun əsasını təşkil edirdi. Və belə zərif seksuallıq parlaq və qışqıran cazibədarlıqdan daha çox diqqət çəkirdi.

Kulta çevrilmiş əşyalar

Ceyn Birkinin obrazlarını təkrarlamaq çox asandır, çünki qız mürəkkəb birləşmələrdən və mürəkkəb kəsimlərdən qaçırdı. Ulduz dar corabları ultra qısa şortlarla geyinməyi çox sevirdilər. Və bəzən o, cins şalvarın üzərində geydiyi hündür çəkmələrə arxalanırdı. 1960-cı illərin sonlarında bu cür təcrübələr əsl inqilab idi. Romantik bluzkalar, alt paltarları, ağ köynəklər və mini yubkalar Ceyn stilinin leytmotivi idi. Ümumiyyətlə, onun üslubu "gözəllik sadəlikdə gizlənib" prinsipi üzərində qurulmuşdu.

Əlbəttə ki, qız aksesuarları da diqqətlə seçirdi və onlar ingilis qadınının rahat üslubuna uyğun olmalı idi. Məsələn, Ceyn gündəlik obrazlarını səbət çantalarla tamamlayırdı. Çoxları buna təəccübləndi, çünki bu cür modellər yalnız sahildə gəzintilər və ya həddindən artıq hallarda pikniklər üçün uyğun idi. Aktrisa onları yalnız yayda sarafan və ya şortla deyil, həm də qışda xəz paltolarla birlikdə cəsarətlə geyinirdi. Ən önəmlisi əfsanəvi sayılan çox “Hermes”çanta modelləri Ceyn sayəsində ərsəyə gəldi. Stil ikonasının şərəfinə çantalara onun soyadı verildi.

Aktrisa sonradan səmimi şəkildə etiraf etmişdi ki, bu gün bu model o qədər baha başa gəlir ki, hətta özünün də onu almağa imkanı çatmır. Və "Hermes"in ancaq bir-iki çantası Ceyninin qarderobunda yer ala bilib. Yeri gəlmişkən, o, həm də bu fotoda bir daha sübut edib ki, əgər obrazda 25 min dollardan yuxarı çanta varsa, hündürdaban ayaqqabının və dar ətəklər geyinmək mənasızdır.

Sirr deyil ki, Ceyn Birkin dünyaya fransız üslubunun nə olduğunu göstərdi. Ancaq o, həm də indi məşhur olan "sakit lüks"ü təbliğ və tərənnüm edirdi. Pastel çalarlar, zərif kəsim, parıltısız dəstlər onun daxili sakitliyini ifadə edirdi.

Dürüstlük, səmimiyyət, cəsarət və orijinallıq kimi vacib xarakter xüsusiyyətlə Ceyn obrazını formalaşdırdı və onun üslubunda əks olundu. Buna görə də ulduz əbədi olaraq moda dünyasının simvolu olaraq qalacaq, çünki o, sadəliyi, epataj və rahatlığı özündə birləşdirən çox ağıllı qadın idi. Birkin bizə göstərdi ki, bu, heç vaxt köhnəlməyən mükəmməl düsturdur.

Aytən Məftun