Türkiyə xüsusi xidmət orqanlarının əməkdaşlarına sui-qəsd - VİDEO

Somalidə Türkiyə xüsusi xidmət orqanlarının əməkdaşlarına sui-qəsd edilib.

Publika.az-ın xarici mətbuata istinadən verdiyi məlumata görə, terrorçular Türkiyə prezidenti Rəcəb Ərdoğanın bu ölkəyə səfərinin hazırlığı üçün paytaxt Moqadişiyə gələn Türkiyə xüsusi xidmət orqanlarının əməkdaşlarını öldürməyə cəhd ediblər.

Somali hüquq-mühafizə orqanlarının əməkdaşının sözlərinə görə, Türkiyə nümayəndə heyətinin olduğu mehmanxananın qarşısında içinə partlayıcı maddə qoyulan avtomobil partladılıb.

Ölən və yaralananlar barədə ziddiyyətli xəbərlər gəlir. “Sky News Arabia” telekanalı beş nəfərin öldüyünü xəbər verib. Onlarla yaralının olduğu deyilir. Türkiyə baş naziri Əhməd Davudoğlu isə 3 Somali vətəndaşının öldüyünü, Türkiyə nümayəndə heyətindən bir nəfərin yüngül yaralandığını bildirib.

“Reuters” agentliyi bildirib ki, partlayışa görə məsuliyyəti "Aş-Şabab" qruplaşması öz üzərinə götürüb.

Ərdoğanın administrasiyasının nümayəndəsi isə prezidentin 23 yanvar tarixinə planlaşdırılan səfərinin ləğv edilməyəcəyini deyib.

Ömər Dağlı