Amerikalı professor ermənilərin bütün ittihamlarını çürütdü: “Buna görə qaçdılar”

Ermənilər soyqırımı iddialarını türklərin qolunu bükmək üçün istifadə edir.

Publika.az xəbər verir ki, bunu ABŞ-ın Luizvill Universitetinin müəllimi, professor Castin Makkarti Türkiyə-Amerika Təhlükəsizlik Vəqfinə (TASFO) müsahibəsində deyib.

1995-ci ildə yayımlanan “Ölüm və Sürgün: Osmanlı müsəlmanlarının etnik təmizliyi, 1821-1922” adlı kitabın müəllifi bildirib ki, 1915-ci il hadisələri ilə bağlı Osmanlının erməniləri yox etməyə çalışdığına dair heç bir tarixi fakt yoxdur.

Onun sözlərinə görə, həmin dövrdə Şərqi Anadolu, Kilikiya və Zaqafqaziyada inanılmaz sayda türk və kürd əhali qırılıb.

“O dövrdə öldürülən türklərin sayı 3 milyonu keçmişdi. Ölən erməni sayı isə 600 minə yaxın idi. Bir tərəfdə erməni və rusların olduğu, digər tərəfdən Osmanlı ordusu və yerli əhalinin olduğu döyüş bölgələrində hər iki tərəfdən 40 faizə qədər insanın öldüyü ortaya çıxır. Buradakı problem sadəcə ölən ermənilərin sayılmasıdır. Belə olduğu təqdirdə, bu, soyqırımı kimi görünür. Amma hər iki tərəfin itkilərini sayanda qorxunc döyüş ortaya çıxır”, - professor deyib.

Onun sözlərinə görə, ermənilər qorxduqları üçün Zaqafqaziyaya köç ediblər: “Çünki ermənilər kürdlər başda olmaqla, yerli əhalinin böyük hissəsini öldürmüşdü. Qalanlarını da məcburi köçkün etmişdi. Gördülər ki, ruslar geri çəkiləndə arxada qalsalar, başları ağrıyacaq. Kürdlər intiqam alacaqdı. Buna görə də qaçdılar”.

Professor qeyd edib ki, Osmanlı telefon kabellərini kəsən, onların konvoyuna hücum edən ermənilərlə savaşmaq üçün 1 milyondan çox əsgərdən istifadə etmək məcburiyyətində qalıb. Erməni təşkilatları isə həmin dövrdə baş verənləri türklərin qolunu bükmək üçün istifadə etməyə çalışır.

Zümrüd