Ərdoğan Trampla bu məsələləri müzakirə edib - Fidan AÇIQLADI

Türkiyə Prezidenti Rəcəb Tayyib Ərdoğan amerikalı həmkarı Donald Trampla Ağ Evdə keçirilən görüşdə Ukraynadakı münaqişənin həlli istiqamətində atılacaq addımları müzakirə edib.

Publika.az xəbər verir ki, bu barədə Türkiyə xarici işlər naziri Hakan Fidan bildirib. Onun bu açıqlamasını Xarici İşlər Nazirliyinin mətbuat xidməti yayıb .

Diplomat qeyd edib ki, müzakirə Moskva ilə Kiyev arasında sülhə nail olmaq üçün Ankara və Vaşinqtonun ata biləcəyi birgə addımlar ətrafında aparılıb.

Diplomatın sözlərinə görə, siyasətçilər Suriya və Qəzza zolağı məsələsini də müzakirə ediblər və ikitərəfli əməkdaşlığı gücləndirmək barədə razılığa gəliblər. Fidan görüşü “konstruktiv və müsbət” adlandırıb.

Amerika və Türkiyə liderləri arasında danışıqlar sentyabrın 25-də Ağ Evdə baş tutub. Həmin gün Tramp Ərdoğanın Ukraynada atəşkəsə əhəmiyyətli təsir göstərə biləcəyinə əminliyini ifadə edib. Görüşdən sonra Türkiyə Prezidenti bəyan edib ki, Ankara münaqişənin həlli istiqamətində səylərini davam etdirmək niyyətindədir.

Hüseyn İbadlı