Rəsmi xronika

Deputatımız AŞPA-nın komitə iclasına qatılacaq

20 Sentyabr 2022 17:32

Milli Məclisin deputatı Sevinc Fətəliyeva AŞPA-nın Sosial məsələlər, səhiyyə və dayanıqlı inkişaf komitəsinin iclasında iştirak etmək üçün sentyabrın 21-də Türkiyənin İzmir şəhərinə səfər edəcək.

Publika.az-ın xəbərinə görə, Milli Məclisin Mətbuat və ictimaiyyətlə əlaqələr şöbəsindən verilən məlumatda bildirilir ki, tədbirdə əmək münasibətlərinin yenidən nəzərdən keçirilməsi, uşaq əməyinin aradan qaldırılması, ictimai səhiyyədə vəziyyət, sağlamlığın qorunmasına vahid yanaşma, peyvənd ayrı-seçkiliyinin qarşısının alınması, silahlı münaqişələrin ətraf mühitə təsiri, təbii fəlakətlərin nəticələrinə qarşı mübarizə strategiyaları və digər məsələlərə baxılacaq.

Yığıncaqda, eyni zamanda, Parlament Assambleyasının fəaliyyəti, Avropa Sosial Xartiyasının 2020–2021-ci illər üzrə nəticələri və islahatlar mövzularında fikir mübadiləsi aparılacaq.

Deputatımız tədbirdə müzakirə olunan məsələlər barədə öz fikirlərini açıqlayacaq.

Səfər sentyabrın 24-də başa çatacaq.

Teqlər Milli Məclis